АВТОВАЗ Lada Granta-ға автомат қорап орнатады

АВТОВАЗ классикалық автомат қораппен жабдықталған Lada Granta-ның саудаға түскенін хабарлады. Марка модельге Ресей-Украина қақтығысына дейін пайдаланған жапониялық Jatco фирмасының төрт сатылы трансмиссиясын қайта орнатады.

Шетелдік өндірушілермен байланыс үзілген соң «Гранта» тек механика қораппен шығып жатқан. «Авторевю» хабарлағандай, бұрын жасалған зат жеткізу жоспарына сай екі жылда Тольяттидегі зауытта 5 мың Jatco автоматы жиналған. Зауыт оларды қосалқы бөлшек бөліміне өткізбек болған, бірақ дилер және сервис орталықтарына мұнша көп бөлшек қажет емес екен. Сол үшін АВТОВАЗ басшылары бұл қораптарды конвейерге қоюға шешім қабылдады.

Автомат қорап Comfort Plus седаны мен 98 ат күшіне ие 16 клапанды мотормен жүретін Club лифтбегіне орнатылады, олардың бағасы — сәйкесінше 1 176 900 және 1 247 900 рубль (~5.65 және 6 млн теңге). Баға өсті. Мысалы, механика қорабы бар ұқсас комплектациядағы Granta Club-ты Ресейде бұдан екі жүз мың рубль (1 млн теңге) арзанға алуға болады.

Қазіргі өндіріс қарқынын ескерсек автомат қорабы бар «гранта» шығару шамамен бір жылға жалғасады.