АВТОВАЗ-дан шетелдік мамандар кетіп жатыр

АВТОВАЗ-бен байланысын үзген Renault Group топ-менеджерлері ресейлік компаниядан кетіп жатыр. Украинамен соғыс басталғаннан кейін Николя Мор орнын босатты. Сол кезде-ақ Lada-ның бас дизайнері, жаңа Renault Duster, Logan/Sandero және ресейлік Arkana-ның нобайын сызған француз Жан-Филипп Салардың (суретте) да қазіргі жұмысында қалмайтыны белгілі болған, — деп жазды «За рулём» журналы. Басылым мәліметінше оның орнына уақытша зауыт ардагері Валерий Фролов тағайындалды.

Қазіргі қолайсыз экономикалық жағдайда француз платформасына негізделген «Ниваның» болашағы бұлыңғыр екені анық. АВТОВАЗ үшін қазір қолданыстағы модельдік топтаманы тұрақтандыру маңызды болып отыр.

Оның үстіне Ресей заңнамасындағы «дос емес ел» анықтамасынан кейін «дос емес концерн» деген түсінік пайда болды. Ресейлік серіктесімен соттасып жатқан Mercedes-Benz Group AG осылай аталды, деп жазды «Коммерсант» газеті. Заңгерлер ресейлік сот дауласушы тарап «дос емес мемлекет» өкілі деген желеумен құқығын қорғаудан бас тартатынын айтады.