«Лада.Онлайн» сайтының хабарлауынша, АВТОВАЗ-дың бір топ қызметкері құрастырылған көліктердің ішіне жасырын орын қалдырып, ұрланған бөлшектерді сонда жасырған. Бұл жолы алаяқтық жүзеге аспады. Полицейлер қылмыстың алдын алды.
Тәртіп сақшылары көліктердің бампері мен аспаптар панелінің астынан 27 орам қосалқы бөлшек тапты. Олардың жалпы саны 1278 дана, ал құны 280 мың рубльден асады. Қазір тергеушілер істің мән-жайын анықтау үшін куәгерлер мен күдіктілерден жауап алып жатыр. Қылмысы дәлелденгендер алты жылға дейін бас бостандығынан айырылады.
Айта кетерлігі, зауыт алаңы мен цехтардың әр бұрышына камера орнатылғанымен, АВТОВАЗ басшылығы сұғанақтардың жолын кесудің амалын таба алмай отыр. Бұл кеңес кезіндегі директорлардың да, ресейлік және шетелдік басқарушылардың да қолынан келмеді. Автокөлік бөлшектері жасыруға оңай ұсақ гауһар емес, ауыр темір болса да оны ұрлаушылар тыйылар емес.
Комментариев: 0