«Автотор» шетелдік көліктерден электромобиль жасайды

Калининград қаласындағы «Автотор» жүргізушілерге көліктерін электрокарға айналдыруға ұсыныс жасайды деп жазды Autonews.ru. Компания бұл қызметін өз дилерлері мен ТЖО арқылы іске асырмақшы, ал сертификаттауды НАМИ өз мойнына алады.

Мамандар машинаның қозғалтқышы, газ шығару жүйесі, жанармай багы, жанармай багының мойны, трансмиссия және жетекті білігін алып тастайды. Салондағы үйреншікті селектор қорабы мен аспаптар комбинациясы жойылады. Автомобильге электромотор, редуктор, инвертор, түрлендіргіш, қуаттау құрылғысы, селектор, батарея, жаңа аспаптар комбинациясы, салқындату жүйесінің электросорғысы, жаңа жетек біліктері, тежеу жүйесінің электросорғысы, желдеткіштің электросорғысы мен жоғары вольтты желі орнатады.

Бөлшектерді қоспағанда бұл қызмет 100 мың рубль тұрады, машина үш-бес күн аралығында дайын болады. «Автотор» Hyundai, Kia, Volkswagen, Toyota, Renault, Škoda, Nissan, Lada, Mercedes-Benz және BMW-ның 2010 жылдан бері шыққан модельдерін электрокарға айналдыру оңай екенін айтады. Жыл аяғына дейін 5 мың машинаны конверсиялау жоспарланған.

Бірақ көлік иелерінің ұзақ уақыт қолдануға жарамды зауыттық жабдығын қайдан шыққаны белгісіз электрожабдыққа ауыстыруы екіталай. Ал жеңіл коммерциялық техниканы өзгертуге болады. АҚШ-та шеберлер осыған ұқсас конверсияны көптен бері жасап жүр, ең үздіктерін SEMA сияқты автошоуларға шығарады.