Автонесие алу қиындады

ҚР Ұлттық банкі 2022 жылдың III тоқсанындағы банктердің несие беру нәтижесін жариялады. 9 айда тұрғындар автонесие алуға 1 млн 221.2 мың өтініш беріпті. Бұл былтырғы ұқсас мезгілдегі көрсеткіштен сәл ғана төмен (—1.7 %).

Ал мақұлданған өтініш саны 22.9 %-ға төмендеді. Мысалы, былтыр 9 айда 168.9 мың азаматтың автонесие алуға берген өтініші мақұлданса, биыл олардың саны 130.3 мың ғана болған. Демек банк мақұлдаған несиелер үлесі 13.6 %-дан 10.7 %-ға азайды.

Ұлттық банк автонесие беру шарты қатаңдап кеткенін айтады: сыйақы мөлшерлемесі өсті және қарыз алушының төлем қабілетіне қойылатын талап күшейді. Оның үстіне көлік қымбаттап, азаматтар банктен сұрайтын несие сомасы да көбейді.

2021 жылдың III тоқсанында автонесиеге өтініштің орташа сомасы 3.08 млн теңге болған, ал биылғы 9 айда ол 4.21 млн теңгеге жетті.

Кей мәлімет бойынша жеңілдікпен автонесие беру желтоқсанның басында қайта басталуы мүмкін. Kolesa.kz редакциясы пайызы төмен автонесие нақты қашан берілетінін дер кезінде хабарлайды.