«Түнгі сот» деп аталатын пилоттық жоба елордада осы жылдың маусым айында іске қосылған еді. Бес ай ішінде Мамандандырылған ауданаралық сот 1 730 әкімшілік істі қараған (яғни бір кеште 10-ға жуық. — Kolesa.kz ескертп.), ал қатысушылар саны 3 560 адамнан асыпты.
Түнгі сот жұмысын бастағалы бері елордада күндізгі уақытта жұмыс істейтін соттардың айлық жүктемесі 50-55 іске кеміген. Нәтижесінде, анағұрлым күрделі істерді қарау сапасы артып, апелляциялық шағымдардың саны да азайған.
Бұл жаңалық көлік иелерінің де көңілінен шыққандай. Тәжірибе көрсеткендей, сот қарастырған істердің көбі ЖКО-мен (ҚР ӘҚБК-нің 610-бабымен — Көлiк құралдары жүргiзушiлерінiң жол жүрісі қағидаларын адамдардың денсаулығына зиян келтiруге, көлiк құралдарының немесе өзге де мүлiктiң бүлінуіне алып келген бұзушылығы) байланысты екен. Егер жол апатына қатысқандар полицейлердің шешімімен келіспесе, олардың ісі қысқартылған тәртіпте түнгі сотта сағат 18:30-дан 22:00-ге дейінгі аралықта қаралады. Тіпті жұмыстан сұранудың да қажеті жоқ. Тұрғындарға жаңа мекемедегі кезектің жоқтығы мен құжаттарды рәсімдеудің жылдамдығы ұнауда.
Сақтандыру компаниялары сот актілерінің заңдық күшіне енуін күтпестен, түнгі сот шығарған қаулы негізінде бағалау шараларын жүргізе алады. Нәтижесінде, ел азаматтары сақтандыру төлемдерін ерте, яғни, акт заңдық күшіне енгеннен кейінгі 3-5 тәулік ішінде ала алады.
ҚР Жоғарғы сотының баспасөз қызметі ел азаматтарынан түнгі соттың жұмысына қатысты шағымдардың түспегенін атап өтті. Ағымдағы жылдың қыркүйек айында осыған ұқсас мекеме Семейде жұмыс істей бастады. Мұндай түнгі соттарды елдің барлық өңірлерінде ашу жоспарланып отыр.
Комментариев: 0