Биыл Қазақстанда өндірілген 2.6 миллион тонна сұйытылған газдың 60 пайыздан астамы машиналарға құйылды. Бұл туралы бүгін, 30 қарашада өткен Үкімет отырысында Энергетика министрі Мағзұм Мырзағалиев айтты. 2019 жылдан бері елімізде газбен жүретін көліктер саны 2.2 есе өсіп, 310 мыңға жеткен. Айта кетерлігі, Қазақстанда дизельмен жүретін машина (жүк көліктерін қосқанда) 70 мың ғана.
Газ өндіру көлемін арттыру мақсатында үш ірі жоба қолға алынады:
- Ақтаудағы жылына 60 мың тонна өнім шығаратын қуаты төмен газ өңдеу зауытын салу. Оның құрылысы 2021 жылдың соңына дейін аяқталуға тиіс;
- Жаңаөзен қаласында өнімділігі жылына 900 млн текше метр болатын (760 млн текше метр тауарлық, 232 мың тоннасы сұйытылған және 82 мың тоннасы пентан-гексан фракциясы) жаңа ГӨЗ салу. Аяқталатын мерзімі — 2023 жыл;
- Қашаған кен орнындағы жылына 1 млрд текше метр шикізат өндіретін (800 млн текше метр тауарлық, 119 мың тоннасы сұйытылған және 35 мың тоннасы конденсат) ГӨЗ салу. Құрылысы 2023 жылы аяқталады.
Министрдің айтуынша, нәтижесінде 2025 жылға қарай елімізде сұйытылған газ өндіру көлемі 300 мың тоннаға артады.
Биыл күзде жанармай құю бекеттерінде газ тапшылығы байқалды. Бірнеше облыс пен Алматыдағы кей бекетте газ мүлде таусылып қалған кездер болды. Осыдан кейін көгілдір отын 115 теңгеден 125 теңгеге дейін қымбаттап кетті.
Комментариев: 0