Автогаз қашан қымбаттайды

Алмасадам Сәтқалиев газдың өзіндік құны 70 теңге болса да, 50 теңгеден сатылады, сондықтан газ саудасымен айналысатын компаниялар табыс тауып жатқан жоқ деді. Салыстыру үшін айтатын болсақ, Ресейде газдың литрі 120 теңге, Тәжікстанда 177 теңге тұрады.

«Әлемдік тәжірибеге сүйенсек, халықты сұйытылған газды автомобиль отыны ретінде қолдануға ынталандыру үшін көгілдір отынды көптеп өндіретін елдер бензин бағасының 70 %-ын құрайтын коэффициент қолданады. Бұл ақылға сыйымды экономикалық механизм. Бізде баға айырмасы кәдімгідей алшақ, сондықтан жүргізушілер отын құны артатынын түсінуі керек. Қазір сұйытылған отын бағасы әр өңірде әртүрлі. Бастапқыда жағдайға байланысты 5-10 теңгеге көтеріледі. Бұл алдағы екі-үш айда болатын процесс», — деді ведомство басшысы.

Содан кейін шенді Бәсекелестікті қорғау және дамыту агенттігімен, депутаттармен бірге газ бағасын нарыққа сай көтеру мезгілін анықтайтынын атап өтті. Болжам бойынша ол алдағы екі-төрт жылда іске асады.

Жанармай бекетіндегі газдың шекті бағасын реттейтін бұйрыққа енетін өзгерісті агенттік мамандары әзірлеп қойыпты. Құжат қоғам талқысынан өтті. Бірақ қашан қабылданатыны белгісіз.

Жобаға сәйкес автогаз бағасы былай өсуі мүмкін:

• Алматыда — 65-тен 75 теңгеге;
• Алматы облысында— 70—75-тен 75–80 теңгеге;
• Абай облысында — 60—65-тен 65–70 теңгеге;
• ШҚО-да— 60—65-тен 70–75 теңгеге;
• СҚО-да — 70—75-тен 75–80 теңгеге.

Басқа өңірлерде өзгеріс болмайды

Елдегі бекеттерде дизель 15-16 сәуірде қымбаттай бастады.