ҚР ІІМ мен Индустрия және инфрақұрылымдық даму министрлігі бірқатар маңызды өзгерістер енген жол картасының жобасын әзірледі.
— Автобустардың елді мекендерде қозғалу жылдамдығын 50 км/сағ-қа, ал қала сыртындағы жылдамдығын 80 км/сағ-қа дейін шектеу жоспарланып отыр. Қазіргі уақытта елді мекендердегі жылдамдық сағатына 60 шақырымнан, ал қала сыртындағы жолдарда 90 шақырымнан аспауы тиіс, — деп бүгінгі брифингте Әкімшілік полиция комитетінің төрағасы Мақсат Байболов мәлімдеді.
Оның айтуынша, жақын арада жол картасы бағдарламасының аясында елімізде саны 90 мыңнан асқан ескі автобустардың қозғалуын шектеу мәселесі талқыланады. Оған қоса, тасымалдаушылар мен қоғамдық көлік жүргізушілеріне қойылатын талап күшейіп, автобустарды қайта жабдықтауға тыйым салынды.
ҚР ІІМ ӘПК-нің басшысы жыл сайын Қазақстанда автобус жүргізушілерінің кінәсінен шамамен 500 апат болып, 50-ге жуық адам қаза табатынын, ал жарақат алғандар саны 700-ден асатынын атап өтті. Бұған жүргізушілердің көлік басқару тәртібінің төмендігі, тиісті профилактикалық жұмыстардың жүргізілмеуі мен автобусты жолға шығаруға жауапты лауазымды тұлғалар тарапынан бақылаудың аздығы себеп болады.
Комментариев: 0