Жаңа машинаның қауіпсіздігін тексеретін агенттіктер өткізетін сынақ жыл санап қиындап барады. Бұл жолы Австралия мамандары автоөндірушілерге тосын сый жасады. Келер жылдың 1 қаңтарынан бастап ANCAP тестінен бес жұлдыз алу үшін автомобиль құрлықта ғана емес, суда да қауіпсіз екенін дәлелдеуге тиіс.
Инженерлер көліктің жүзу қабілетіне емес, суға батқан көліктен адамдардың шығу мүмкіндігіне баға береді. Бұған электронды жүйелердің көбеюі себеп болса керек. Электр көмегімен жұмыс істейтін құрылғылар қарапайым механикалық дүниелерді ығыстырып жатыр.
ANCAP талабы бойынша сынақтан сүрінбей өту үшін автокөлік суға түскен соң он минут ішінде есік-терезені ашу мүмкіндігін сақтап қалуға тиіс. Болмаса салонда әйнек шағатын құрал, ал мануалда оны қалай қолдану керектігі толық жазылған нұсқау болу керек. Осындайда еске бірден автобустағы кішкене балға түседі.
Жаңа көліктердің бұл сынақтан қалай өтетінін алғашқы тест көрсетеді. Сондықтан 2023 жылды күтеміз. Мұндай сынақ түрі басқа елдерде қолданысқа ене ме екен деген сұрақ та мазалайды.
Комментариев: 0