Avatr 11 жаңарып, гибрид болды

Avatr Қытайда 11 индексті кроссовердің жаңарған нұсқасын көрсетті. Басты жаңалық — гибрид күштік құрылымның арқасында мотор гаммасы кеңейді. Бұл нұсқа жаңа аудиторияны қызықтырады деген сенім бар. Электрлі түрленім қуатты мотор және ұзақ жүріс қорымен ерекшеленеді. Бағасы — 279 900 юань (20 млн теңге).

Гибрид Avatr 11-дің күштік құрылымының бензинді бөлігі — 156 ат күшіне ие 1.5 литрлік агрегаттан, ал электрлі бөлігі артқы осьтегі 314 ат күшіне ие (367Нм) мотордан тұрады. 39 киловатт батареямен кроссовер 225 км жол жүреді, ал іштен жанатын қозғалтқыштың арқасында жүріс қоры 1065 км-ге жетеді. Бензоэлектрлі Avatr 11 алғашқы жүздікті 6.9 секундта еңсереді.

1 / 5

• 
• 
• 
• 
• 

1 / 5

Модельдің батареялы нұсқасы моно немесе толық жетекті болады. Бірінші жағдайда жаңарған 11-дің моторы — 322 ат күші мен 396 Нм, ал екінші жағдайда 547 ат күші мен 687 Нм береді. Екі жағдайда да Avatr 11-дің динамикасы жақсы болды, 6.5 немесе 3.9 секундта жүзге дейін жылдамдық алады.

Кроссовер енді базалық 90 киловатт батареямен жабдықталмайды, топтамада 116.8 кВт⋅сағ батарея ғана қалады. Соған сай жүріс қоры да өсті. Бір моторлы Avatr 11-дің жүріс қоры — 815 км, толық жетекті нұсқанікі 760 км болады.

Машинаның сырт пішініндегі басты өзгеріс ретінде пластик алдыңғы бамперді айтуға болады, ал интерьерінде еш өзгеріс жоқ. Электрлі түрленімнің бағасы 339 900 юаньнан (24.5 млн теңге) басталады.