Аустралияда көлік нөмірінің бағасы 6 млн доллардан асты

Lloyds аукционы Аустралияда шыққан алғашқы нөмірлердің бірін сатуға қойды. Ол Жаңа Оңтүстік Уэльс штатының 1 цифры бар мемлекеттік тіркеу нөмірі. Нөмір өткен ғасырдың басында, штат автомобильді тіркеу жүйесін алғаш енгізген кезде жасалған. Металл тақта бағасы қазір 10 010 000 Аустралия долларына (6.7 млн АҚШ доллары) жетті, аукцион 27 қаңтарға дейін жалғасатынын ескерсек, баға әлі өсетіні анық.

Аустралияда көлік нөмірі 1910 жылдан бастап беріледі, әр штат үшін нөмір белгісі 1-ден 274-000-ге дейінгі сандар болатын. Демек әр штатта бір цифрдан тұратын тоғыз тақта ғана бар деген сөз. Оларға коллекционерлер қатты қызығады. Жаңа Оңтүстік Уэльс штатының 1-нөмірлі белгісі аукционға алғаш рет шығып отыр.

Нөмір әу баста мемлекеттік полиция комиссарының автомобилінде болған. 1930 жылдары ол теміржолда жұмыс істейтін Фредерик Стюарттың қолына өтті, Стюарт кейін автобус фирмасын басқарды және Australian National Airways әуе компаниясының негізін қалады. Стюарт нөмірді 1961 жылы қайтыс болғанға дейін пайдаланды, содан кейін раритетке оның әйелі иелік етті.

1988 жылы біреулер нөмірді 200 мың долларға сатып алмақ болған, бірақ әйел сатудан бас тартты. Мэйджори Стюарт 2000 жылы қайтыс болды, содан бері нөмір кімнің қолында болғаны белгісіз.

Нөмірді сатып алған адам оны коллекция ретінде сақтайтын шығар. Бірақ сирек кездесетін автомобильге тағуы да ғажап емес. СNSW 1 кез келген аустралиялық ретрокардан қымбат болуы мүмкін.