Ауған королі мінген «мерседес» Пеббл-Бичте үздік атанды

1937 жылы ауған монархы ерекше Mercedes-Benz 540 K Special Roadster-ге тапсырыс берген. Автомобильді сатып алуға 23 жастағы Мохаммад Захир Шах 16 мың доллар (қазіргі ақшамен шамамен 340 мың доллар) жұмсады. Сөйтіп атақты клиент компрессорлы мотормен жабдықталған ерекше әдемі, төбесі ашық спорттық автомобиль иесі атанды. Бұл родстердің бірнеше данаcы ғана шыққан, қосалқы дөңгелек басқа 540 K моделіндегі сияқты жүксалғыш сыртында ілініп тұрған жоқ, ол ұзарған жүксалғышта орналасқан.

Екінші дүниежүзілік соғыс жылдары 540 K Special Roadster Париждегі Ауғанстан елшілігінің гаражында тұрған. Сондықтан машина Францияны басып алған немістер үшін де, кейінірек азат етеміз деп барып, люкс машиналарды тәркілеген америкалықтар үшін де арман болып қалды.

1 / 6

• 
• 
• 
• 
• 
• 

1 / 6

1948 жылы Захир Шах «мерседесті» күйеу баласына сыйлап, өзі жаңа автомобильге ауысты. Бірнеше жылдан кейін монархтың туысы неміс көлігін Ұлыбританияға алып кетіп, Chipstead Motors Ltd сауда компаниясына сатып жіберген. Ал компания үстіне тағы ақша қосып, родстерді мұхиттың арғы жағында тұратын жаңа иесіне өткізіпті. 1953 жылдың желтоқсанында Лондонда тұрған Mercedes-Benz 540 K Special Roadster Флоридадан бір-ақ шықты.

АҚШ-та автомобиль ұзақ тұрақтады. Арагідік салтанатты дефиледе бой көрсеткен родстер небәрі 13 мың миль жол жүріпті. Бұл машинаны елден ерек ететін тағы бір жайт — бөлшектеріндегі Typenshield және Kommission белгілері бар түпнұсқа комплектациясы мен Англияда орнатқан Dunlop ретрошинасының сақталуы.

Mercedes-Benz 540 K Special Roadster-дің ақырғы бағасы 10 млн долларға жетті, жылдар өте құны өсе беретіні күмәнсіз. Тек автоклассика жанкүйерлерінің жас емес екені көңілге кірбің түсіреді. Мысалы, автомобильдің қазіргі иесі кәсіпкер Джим Паттерсон 1933 жылы туған. Басқаша айтқанда, неміс инженерлері Зиндельфингенде 540 K моделін құрастырып жатқанда, ол Луисвилде (Кентукки штаты) ойнап жүрген бала еді.