Audi Қытай нарығы үшін логотипін өзгертеді

Audi араға көп жыл салып, алғаш рет төрт сақиналы логотипінен бас тартады. Reuters таратқан ақпаратқа сүйенсек, мұндай шешім қабылдауға Қытай нарығы түрткі болған. Компания аталған елге эксклюзив электрокарлар топтамасын ұсынады. Оны SAIC концернімен бірге жасайды екен.

Болашақ электромобильдер әзірше Purple атауына ие. Олар SAIC меншігіндегі IM Motors брендінің платформасын, CATL батареясын алады. Жобаға толығымен автономды басқару жүйесін жасайтын Momenta компаниясы да қатысады.

2030 жылға қарай топтама жап-жаңа 9 модельден тұрады. Мамандар логотип болмаса да, барлық машина Audi-дің беделіне сай келетінін атап өтті. Неміс компаниясының мұндай қадамға баруына өнім ұсынудағы нюанстар себеп болған көрінеді. Дегенмен, бренд Қытай нарығына жеке суббренд шығара ма, әлде фирмалық белгісін өзгертумен шектеле ме, белгісіз.

Әйгілі марканың айрықша топтамасы туралы толық ақпарат қарашада, концепт-кардың ресми тұсаукесерінде айтылады. Audi мен SAIC бірге атқарған істің нәтижесін сол кезде көреміз. Бренд соңғы рет Еуропа тұрғындарына ұсынған батареялы өнім Audi A6 болатын.