Kolesa.kz сайтында үшінші буындағы Audi 100 сатуға қойылды. Ең алдымен көліктің бағасы назар аудартады. 1990 жылғы седан 4.4 миллион теңгеге бағаланып отыр. Аналитика дерегіне сүйенсек, бұл сайттағы ұқсас машиналардың орташа бағасынан төрт есе жоғары (сатылымдағы ең қымбат «жүздік»).
Иесі Audi-дің көп жыл бойы гаражда тұрғанын, жағдайы керемет екенін жазыпты. 124 мың шақырым жол жүрген. Фотосуреттен седанның сырты да, салоны да жақсы сақталғанын байқауға болады.
Машина 136 ат күшіне ие 2.3 литрлік 5 цилиндрлі мотормен жабдықталған. Ол айналу моментін алдыңғы дөңгелектерге беретін механикамен жұмыс істейді.
Анықтама ретінде: C3 индексіне ие Audi 100 1982 жылы жарық көрді. Бүкіл әлемде модельдің 976 мың данасы сатылған. Ең көп өткені әрине седан болды (852 мың). Audi 100 C3 өндірісі 1990 жылдардың басында С4 жарық көрген кезде тоқтады. Бірақ машина конвейерден ресми 2005 жылы ғана түсті. Модель Қытайдағы FAW-VW зауытында шығарылды, оған тіпті Hongqi белгісі тағылған. Қытайлық машина CA7180A2E деп аталды.
Комментариев: 0