Атырауда автогаз талонмен сатылуда

«Мен таксистпін. Машинам газбен жүреді. Бірнеше күн бойы жанармай құю бекеттерінде ұзын-сонар кезек пайда болды, себебі барлық жерде газ болмады. Қазір оны тек талонмен бере бастады. Бүгін жұмысқа шыға алмадым, ал менің төлейтін несием, асырайтын отбасым бар. Автогаз бекеттерінде газ жоқ», — деп Atyrau ONLINE Нариман Қарышевтің сөзін мысалға келтірді. Атырау облысында көгілдір отын бірнеше апта тапшы. Жүргізушілер сағаттап кезекте тұрады, алайда әкімдік жағдай бақылауда дейді. Шенеуніктердің айтуынша облыстағы 101 жанармай құю станциясының 86-сы ғана жұмыс істеп тұр.

«Энергетика министрлігінің хаттамалық тапсырмасына сәйкес «АМӨЗ» ЖШС зауытында 1 қазаннан бастап жоспарлы жыл сайынғы жөндеу жұмыстары жүріп жатыр. Соның нәтижесінде Атырау облысының ішкі нарығына «АМӨЗ» ЖШС — 408 тонна, «Жайықмұнайгаз» ЖШС (Батыс Қазақстан облысы) — 2490 тонна, «СНПС-Ақтөбемұнайгаз» АҚ (Ақтөбе облысы) — 4122 тонна сұйытылған мұнай газ жөнелтеді. АМӨЗ қыркүйекте 3016 тонна, ал қазанда 882 тонна газ бөлді. Зауыт сұйық отынды толықтай жөнелтті. Қосымша 940 тонна зауыт іске қосылғаннан кейін жіберіледі», — деп түсіндірді әкімдік.

Билік 3 қазаннан бастап Батыс Қазақстан және Ақтөбе облыстарынан Атырауға газ бөліп жатыр. Соңғы күндері аймаққа Оралдан 1540 тонна (тәулігіне 100–110 тонна), сондай-ақ Ақтөбеден 936 тонна келді. Келесі 180 тонна 15 қазанда жіберіледі.

Батыс Қазақстан облысында да газ тапшы. Автогаз бекетінің иелері жағдайды пайдаланып жүргізушілерге газды қосымша тауармен сатуға тырысып жатыр. Облыс әкімдігі аймақтағы жанармай құю бекеттерінде сұйытылған газдың жетіспеушілігіне газбен жүретін автомобильдің көбеюі себеп болды деп түсіндірді. Биыл аймақта тіркелген әр оныншы көлік газбаллонмен жабдықталған. Соңғы бір жылда мұндай көліктің саны 30 %-ға өсті.