Асы үстіртінде қалған автотуристер таудан түсті

Өткен кеште құтқарушылар алғаш боп балалар мен әйелдерді қар құрсауынан шығарды. Одан кейін өзге туристер таудан түсе бастады, құтқарушылар оларға трактормен жол ашты.

5 қаңтар таңғы 9:00-дегі жағдай бойынша биікте бұзылған жеті жол талғамайтын көлік қана қалғаны белгілі болды. Машиналарда 10–14 адам бар.

Бірнеше сағаттан кейін Алматы облысы ТЖД Бартоғай су қоймасында қар құрсауында қалған 22 техника мен 81 адам (57 ер, 16 әйел және 8 бала) эвакуацияланғанын хабарлады. Енді 12 жүргізуші мен 16 автотехника (төртеуі бұзылған) қалды. Тауда қалғандар арасында әйелдер мен балалар жоқ.

Бөгеліп қалған колоннаға ТЖД қызметкерлері мен РЖҚЖ құтқарушылары көмектесіп жатыр. Олар екі ауысымды жылыту пунктін ұйымдастырды. Жергілікті атқарушы органдармен және еріктілермен бірге жанармай, жылы көрпе, азық-түлік жеткізді.

Эвакуация жұмысына бүгін сағат 09:40-та Батанға дейінгі жолдың 23–25 шақырымына түскен үш қар көшкіні қиындық туғызды. Жолды «Қазселденқорғау» ММ мен ЖҚБ-13 тазартады. Құтқару жұмыстарын Алматы қаласы РЖҚЖ және Алматы облысы ТЖД жүргізіп жатыр.