Өткен жексенбіде Астана көшелерінде голливудтық киноға бергісіз оқиға орын алды. Қара түсті VW Touareg темір тұлпарын тізгіндеген жүргізуші басқа көлікке соқтығысқаннан кейін өзінің автокөлігіне жармасқан тәртіп сақшысын көзге ілместен, кемі тағы бір көлікке соғылып, оқиға орнынан ізін суытпақ болады. Полиция қызметкерлері көлік дөңгелегіне оқ ату арқылы ғана әлгі есерсоқты тоқтата алған.
Елордалық полиция департаментінің баспасөз қызметі берген деректерге сәйкес, алғашқы ЖКО Жұбанов көшесінде болған екен, мұнда қара түсті Volkswagen Touareg көлігінің жүргізушісі Lada Vesta-мен соқтығысқан. Алайда, инстаграм желісіндегі astanovka98 арнасында пікір жазған оқиға куәгерлері дәл сол Touareg-тің ауладан шығып бара жатып Hyundai Tucson көлігіне соғылғанын айтады. Жүргізушілер арасында жанжал шығып, өтіп бара жатқандар оларды ажыратпақ болған екен, бірақ Touareg тізгініндегі азамат басы-көзіне қарамай, елдің бәріне жұдырығын ала жүгіріпті, содан кейін жол бойында тұрған «Ладаға» шығып алып, секіре бастаған, одан түсіп, қайтадан Tucson-ның жүргізушісіне тап беріпті.
View this post on Instagram
Оқиға орнына жеткен полиция экипажы төбелескіш жүргізушіні ұстамақ болғанда, әлгі өз көлігіне отыра салып, Абай даңғылы мен Жұбанов көшесінің қиылысында тұрған Toyota көлігін соғып, оны тоқтатпақ болған тәртіп сақшысын іле кеткен. Бұл қуғынға қатысқан полиция қызметкерлері ереже бұзушының олардың талаптарына құлақ аспайтынына көз жеткізген соң, көліктің дөңгелегіне екі рет оқ атқан, алайда бұл әрекет бірден нәтиже бермепті — дөңгелегінің желі шыққан көлік біраз уақыт қозғалысын жалғастырған.
Нәтижесінде, Touareg Құдайбердіұлы көшесінде қолға түскен, ал ішімдікке сылқия тойып алған 35 жасар ереже бұзушы құрықталып, уақытша ұстау изоляторына қамалыпты. Қазіргі таңда ҚР ҚК-нің 380-бабы ( Билік өкiлiнің өз қызметтік мiндеттерiн атқаруына байланысты не қызметтік міндеттерін орындағаны үшін оның өмiрiне немесе денсаулығына күш қолдану) бойынша тергеу жұмыстары жүргізілуде. Ал жарақат алған тәртіп сақшысы ауруханаға жеткізіліпті.
Комментариев: 0