Елордада полиция департаментінің жеке құрамын шамамен он пайызға қысқарту жоспарлануда, ал үнемделген қаражат өзге қызметкерлердің айлығын көтеруге жұмсалмақ. Органның бұрынғы бес жұлдызды қонақ үйдің ғимаратына көшуі де біраз шығынды талап етеді, оны жөндеу жұмыстарына бір жарым миллиард теңгеден астам қаржы жұмсалатын көрінеді.
Астана қалалық полиция департаменті басшысының орынбасары Сабыр Жүсіпбековтің айтуынша, 2019 жылдың қаңтарынан наурызына дейін департаментте штаттан тыс аттестация өтеді екен, әрі жұмыстан қағылатын қызметкерлер де соның нәтижесінде анықталатын сыңайлы. EXPO шарасының алдында қосымша 1 500 қызметкер жұмысқа алынған болатын, ал оларға төленетін айлық республикалық бюджеттен бөлінген еді. Қазір аталған жағдай қайта қарастырылуда, алдын ала жасалған болжам бойынша қызметкерлердің шамамен 10 пайызы қысқартылуы мүмкін, бірақ бұл сан тәртіп сақшыларының Астанада дұрыс жұмыс жасауына жеткілікті мөлшерден аспауы тиіс. Бұл орайда, жалақы қоры бұрынғы деңгейде қалып, қалған қызметкерлердің айлығын көтеруге бағытталады. Мәселен, сержанттар қазір шамамен 70 мың теңге көлемінде айлық алады. Қазіргі таңда департамент штатында 5 500 адам жұмыс істейді.
Полиция департаменті көшкелі отырған «Рамада Плаза» деп аталатын бұрынғы бес жұлдызды қонақ үйдің ғимаратын жөндеу де біраз қаражатты талап етеді. Алдын ала жасалған бағалау жұмыстарының мәліметтеріне сай, оның құны 1.6 млрд теңгені құрайды екен, алайда нақты сома жобалық-сметалық құжаттар әзірленгеннен кейін ғана белгілі болады. Әзірше ғимаратты техникалық тексеру шаралары жалғасуда. Жөндеу жұмыстарын қаржыландыру арнайы бюджеттік бағдарлама есебінен жүзеге асады.
Елордалық полиция департаментінің үш жылдық бюджеті 29 млрд 186 млн 167 мың теңгені құрайды, оның ішінде 2019 жылғы көлемі — 10 млрд 175 млн 245 мың.
Комментариев: 0