Астанада LRT бағанына соғылған жүргізуші мас болмаған

29 маусым таңғы 6:00 шамасында Сығанақ көшесінде орналасқан «Арыс» көпірінде Chevrolet Malibu бетон бағанаға соғылған еді. Көлік тізгініндегі ер адам оқиға орнында қайтыс болды.

«Хабар» телеарнасының «Жеті күн» бағдарламасында Астана қаласы полиция департаментінің басшысы Елжан Чупеков оқиға кезінде жүргізуші ішімдік ішпегенін айтты.

«Бақылау камерасынан байқағанымыз көпірге көтеріліп келе жатқанда Jusan Bank-ке қарама-қарсы орналасқан «Сергек» 66 км/сағ жылдамдықты тіркепті. Жүргізуші жылдамдықты шамалы ғана асырған. Бағанға соғылған кездегі жылдамдық зерттеліп жатыр. Сараптама ер адамның мас болмағанын көрсетті. Ол оқиға орнында қайтыс болды. Көлік апатына не себеп болғаны белгісіз» — деді полицей.