Астанада көлікті айыптұраққа жеткізу және сонда сақтау қанша тұрады

«Астанада жол қозғалысын ұйымдастырудың кейбір мәселесі туралы» мәслихат шешімінің жобасын жауапты мекеме өткен күзде дайындай бастаған. Құжатта көлік құралын жеткізу (эвакуация) және оны арнайы алаң мен тұрақта уақытша сақтау құны жазылады.

Tengrinews.kz хабарлағандай, тарифті «Астана қаласының жол қозғалысын ұйымдастыру орталығы» ЖШС ұсынған. Жергілікті орган көлікті айыптұраққа жеткізу құнын 6 АЕК деңгейінде белгілемек (2026 жылы 29 950 теңге), сақтау ақысы басқаша, мысалы:

• эвакуация басталған сәттен бастап 3 сағатқа дейін — тегін;
• бірінші тәулік — 1.5–5 АЕК (2026 жылы 6 487–21 625 теңге);
• әр келесі тәулік үшін — 2–7 АЕК (2026 жылы 8 650–30 275 теңге).

Нақты сома неге байланысты болатыны әзірге белгісіз. Қылмыстық істі тергеу барысында айыптұраққа кеткен көлікті сақтау ақысы қалай есептелетіні де түсініксіз. Мұндай техника кейде жылдар бойы қозғалмай тұрады. Дегенмен шенділер эвакуация заңсыз болса ақшаны қайтаратынын, иесі 30 күн ішінде төлем жасамаса қарызды сот арқылы өндіріп алатынын айтты.

Полиция эвакуация алдында көлікті тексеріп, барлық көрінетін зақымды (сызат, шанағы майысқан және т.б.) жазып алып, ақау туралы акт жасайды. Фото және видео түсіреді. Бұл материалдар кемінде үш ай сақталады, қажет жағдайда көлік иесіне беріледі. Салонда адам немесе жануар болса, техниканы эвакуаторға тиеуге рұқсат жоқ.

Жүргізуші эвакуация басталғанға дейін келіп, қате әрекетін түзесе, полиция көлікті алмайды. Тиеу процесі басталып кетсе, қызмет ақысын төлеуге тура келеді. Эвакуациядан кейін полиция көлікті қайда апаратынын, сақтау құнын және оны қалай кері алуға болатынын хабарлайды.

Полиция көлікті айыптұраққа жеткізген соң оны қайта тексереді. Бұрын болмаған зақым тапса, жазып алады. Автомобиль арнайы орынға жеткен сәттен бастап оған тұрақ әкімшілігі жауап береді.

Машинаны қайтарып алу үшін қатені түзеп, эвакуация мен сақтау ақысын төлеп, көлікті ұстаған органнан рұқсат алу қажет. Қайтару кезінде акт жасалады, жауапты орган көлікті қайта тексереді, фото-видео түсіреді, кейін иесіне береді.

Мәжіліс депутаттары эвакуация және сақтау тарифін бекітті. Көлік жеткізу 3 АЕК — 12 975 теңге болады. Айыптұрақта сақтау тарифі (бұрын тегін еді) көлік түрі мен мерзімге байланысты, олар:

• Мотоцикл — алғашқы тәулігіне 1 АЕК немесе 4 325 теңге, одан кейін 2 АЕК (8 650 теңге).
• Үш дөңгелекті көлік пен квадроцикл — алғашқы тәулігіне 1.5 АЕК немесе 6 488 теңге, одан кейін 3 АЕК (12 975 теңге).
• Жеңіл көлік — алғашқы тәулігіне 3 АЕК немесе 12 975 теңге, одан кейін 5 АЕК (21 625 теңге).
• Жүк көтергіштігі 3.5 тоннадан аспайтын жүк көлігі — алғашқы тәулігіне 5 АЕК немесе 21 625 теңге, одан кейін 7 АЕК (30 275 теңге).
• Тіркеме — 2 АЕК немесе 8 650 теңгеден 5 АЕК немесе 21 625 теңгеге дейін.

Көлігін тұраққа дұрыс қоймаған жүргізушілер 15 сәуірге дейін ескерту алады, айыппұл арқаламайды, ал эвакуация мен сақтау үшін 23 сәуірде төлей бастайды.