Әккі алаяқтардың құрығына көбіне «Индрайвер» қосымшасы арқылы жеке тасымалмен айналысатын жүргізушілер түседі екен. Астана қалалық ІІД-нің баспасөз қызметі хабарлағандай, алаяқтар азық-түлік тауарларын жеткізу қызметіне тапсырыс беруші кейпінде, түрлі сылтаулармен жүргізушінің төлем терминалдары арқылы ақша аударуын сұрап, белгіленген мекенжайға келгенде қолма-қол ақшамен қайтаратынын және жеткізу қызметі үшін 5000-нан 10000 теңгеге дейін төлейтінін айтып, оған қоса азық-түлікке кеткен қаражатты қайтаратынына да уәде береді екен. Бұған алданған аңғал жүргізушілер нәтижесінде жер сипап қалады.
Жуырда астаналық тәртіп сақшылары Павлодарда қаласында, жоғарыда аталған жоспар бойынша такси жүргізушілерін алдап соққан 23 жасар Шығыс Қазақстан тұрғынын құрықтады. Жергілікті ІІД-де алаяқтар ғаламтор арқылы сан соқтырған жүргізушілердің 10 арызы жатыр.
Алданып қалмас үшін полиция қызметкерлері мынадай кеңестер береді:
— интернет-қосымшалардағы күдікті мәмілелер мен тартымды ұсыныстардан бас тартыңыз;
— алдын ала төлем жасауға келісім бермеңіз;
— мәміленің тазалығына көз жеткізбей тұрып, белгісіз тұлғаларға төлем жүйелері арқылы, тіпті басқа банктердің карталарына да ақша аудармаңыз;
— алаяқтық әрекеттер жайлы полицияға 102 нөмірі немесе өзіңіз тұратын аймақтың ІІД-нің нөмірі арқылы тез арада хабар беріңіз.
Комментариев: 0