Астана жолдарын SOVA бақылайды

Астанада Қабанбай батыр даңғылындағы автотұраққа алғашқы SOVA фотовидео құрылғысы орнатылды. Техника былтыр 1 желтоқсаннан бері сынақ режимінде жұмыс істеп тұр, айына орта есеппен 300-ге жуық ереже бұзу әрекетін тіркейді. Егер жаңа өнімді қала билігі мақұлдаса, мұндай камера Астанадағы автотұрақтардың бәріне қойылуы мүмкін.

SOVA кешені Sergek-ке ұқсас, бірақ ол Ресей өнімі. Ресми сайтта құрылғы «көлік құралын қою және тоқтату ережесін бұзғандарды анықтап, материалды автоматты түрде тиісті органға жіберетіні» жазылған.

Камераның көру аумағы — 360°, көре алатын аралық — 150 м, жұмыс режимі — 24/7. Жабдық қараңғыда да жұмыс істей алады, 25 түрлі жол ережесін бұзу әрекетін тіркейді, оның көбі тұраққа қатысты:

• «Аялдауға болмайды» белгісі бар аумаққа тоқтау.
• «Тұраққа тыйым салынады» белгісі бар жерге тоқтау.
• Сары сызық сызылған жерге тоқтау (1.4).
• Автотұрақ ақысын төлемеу.
• Тротуарға машина қою.
• Жаяу жүргіншілер өткеліне машина қою.
• Көгалға машина қою.
• Таксиге арналған аумаққа машина қою.
• Жаяу жүргіншілерге арналған аумаққа машина қою.
• Мүгедектерге арналған орынға машина қою.
• Веложолға машина қою.
• Екінші жолаққа машина қою.
• Жол қиылысына машина қою.
• Көлікті автотұраққа қою ережесін бұзу.
• Жол таңбасы талабын елемеу.
• Тоқтау сызығын басып тоқтау.
• Сары жол таңбасы бар қиылыста тоқтау (1.26.).
• Жаяу жүргіншілерге арналған жермен жүру.
• Жаяу жүргіншіге жол бермеу.
• Көгалда көлік жүргізу.
• «Жұп күндері көлік қоюға тыйым салынады» белгісі бар аумаққа машина қою.
• «Тақ күндері көлік қоюға тыйым салынады» белгісі бар аумаққа машина қою.
• Тыйым салу белгісі бар жермен жүру.
• Қоғамдық көлік жолағына машина қою.
• Көлiк құралын автобус аялдамасы немесе таксиге арналған аумаққа тоқтату және автобус аялдамасы немесе таксиге арналған аумаққа 15 метрден жақын жерге тоқтау.

Сондай-ақ «сова» жақын маңдағы жол белгісі, бағана, бағдаршам және т.б. жағдайын бақылайды, бұдан бөлек жолдағы және автотұрақтағы кептеліс туралы статистика жинайды. Әзірлеушілер камера көшенің цифрлы моделін көріп, көліктің кей бөлігін басқа зат қалқалап тұрса да ереже бұзғанын анықтай алатынын айтты. Мысалы, электроника көлік нөмірін жүргізуші оны жапқанға дейін суретке түсіріп алады, соның арқасында ереже бұзғандарды анықтап, ақылы тұрақ есебін 99 % дәл тіркейді.

Жаңа камераның техникалық жағдайын «Астана тұрақ кеңістігі» компаниясының мамандары қадағалайды.