Асфальттың сапасы неге нашар?

Қазақстандағы жол құрылысының сапасын мәжіліс депутаттары талқылады. Депутат Айдарбек Қожаназаров бұл жүйелі мәселе екенін және жылдар бойы шешілмей келе жатқанын атап өтті. Қолданыстағы шаралар нәтиже бермейді. Мәселе тек климаттық жағдай мен жүктемеде емес, материалдардың сапасында. Мәжілісменнің айтуынша былтырғы сынамалардың шамамен 12 %-ы талаптарға сай келмеген, кейбір өндірушінің өнімінде ақау үлесі 48 %-ға жеткен. Сонымен қатар жұмысшылар материалды алмастыруы мүмкін. Зертханаға бір битум жіберіп, құрылыс кезінде басқа битум қолданатын сияқты.

А. Қожаназаров норма бойынша созылғыштығы 90 см болатын битум орнына көрсеткіші 107.3 см төсем пайдаланғандар болды деді. Кейін мердігер ұйымдар сапасыз материалмен жөндеген жолды кепілдік міндеттемесі бойынша қалпына келтіруге мәжбүр болған.

Жағдайды бақылау үшін депутат битумның әр партиясын (өндірістен бастап, төселгенге дейін) таңбалап, міндетті түрде цифрлық мониторинг енгізуді ұсынды. Өндірушілер сапасыз өнім жеткізсе, шығынды толық өтеуге (қайта жөндеу жұмыстарын қосқанда) тиіс, ал лауазымды тұлғалар үшін тиімділік көрсеткішін енгізіп, жол материалдарына жауапты ету керек.

Жаңа төселген асфальтта ойықтың пайда болуы бұрыннан келе жатқан проблема. Кей жағдайда жол төсемі бір жыл өтпей шөгіп кетеді. Мұндай жағдай Алматыдағы Абай даңғылында және бірқатар көшеде туындады. Америкалық полимер қоспа да көмектеспеді. Көптеген магистральда аптап ыстықта асфальт шынымен жұмсарып кеткен. Оны қарапайым қарындашпен тесуге болады, тіпті адамның ізі қалып қояды.