Аса қымбат Ferrari жарыста өртеніп кете жаздады

Күтпеген оқиға өткен демалыста раритет және винтажды автомобильдер қатысқан Goodwood Revival фестивалінде болды. Бағдарлама бойынша жарысқа классикалық көліктер қатысады, соның бірінде Ferrari 250 GTO өртенуге сәл қалды. 250 GTO моделі әлемдегі ең қымбат Ferrari саналады.

Раритет Lavant Cup сайысына қатысқан. Ferrari-дің винтажды гранд-турерлеріне арналған бұл бәйгені Грэм Хиллдың Гудвудтағы жеңісінің құрметіне ұйымдастырған. 1963 жылы шабандоз Ferrari 250 GTO тізгінінде жарыc жолына шыққан еді.

Бәйгеде 16 автомобиль бой көрсетті. Формула-1-дің экс-пилоты Карен Чандхок үшінші болып келе жатқан, бірақ мәреге жақындағанда көліктің қозғалтқышы шыдамай, жарылып кетті. Карен бірден әрекет етіп, еш саспастан автомобильді жол жиегіне шығарды. Шабандоз жол жабынына май тимеу үшін осылай істеген. Пилот дін аман, тек аяқкиімінің табаны балқып кеткен.

Қозғалтқыштан май ағып, өрт тұтанғаны кейін белгілі болды. Сарапшылардың сөзіне сенсек, раритетті қалпына келтіруге болады, алайда біраз шығындалу керек. Ferrari 250 GTO иесінің өкілі аса қымбат купені жөндейтінін және спорткар ерте ме, кеш пе классикалық машиналар жарысына қайта оралатынын мәлімдеді.

Ferrari-дің ең қымбат моделі — 2018 жылы саудаланған 250 GTO. Көлік үшін клиент 48.4 миллион доллар санап беріпті. Қарашада 1962 жылғы Ferrari 330 LM бәссаудаға шығады, сол кезде рекорд жаңаратын сияқты. Болжам бойынша оның құны 60 миллион долларға жуықтайды.