Жүргізушілердің қоғамдық көлікке арналған жолаққа қатысты әрекеті сан түрлі. Біреулер кептеліс кезінде жолаққа шығып алса, айыппұлдан қорқатындар оған мүлде жақындамауға тырысады.
ҚР ЖҚЕ-нің 18.2 тармағында «24 бөлімнің 2 және 4-тармағында қарастырылған жағдайларды қоспағанда, 5.9, 5.10.1.-5.10.3 белгiлерiмен белгiленген, маршруттық көлiк құралдарына арналған жолағы бар жолдарда осы жолақпен басқа көлiк құралдарының қозғалуына және аялдауына тыйым салынады» деп жазылған.
Яғни, қоғамдық көлікке арналған жолақпен емін-еркін жүйткіп жүрген жеңіл көлік иелері ережені ескермей жүр. Әкімшілік кодекстің 601-бабы бойынша оларға 3 АЕК мөлшерінде айыппұл салынады, ал бір жыл ішінде қайталаса 10 АЕК ақша төлеуге міндеттеледі. Дегенмен, біз жоғарыда атап өткен жол ережесінің 24-бөлімі, 2 және 4-тармағы жолаққа шығуға рұқсат береді. Кімге? Велосипедшілер мен мопед тізгіндегендерге. Велосипедшілер көшеде өздеріне арналған жолақ болмаса тротуарға да шыға алады, ал мопед рөліндегілер мұндай жағдайда жүргін бөліктің оң жағымен қозғалуы тиіс, яғни автобус жолағымен жүруге құқылы.
Жол ережесіне сәйкес, автобус жолағымен шұғыл және арнайы қызметке тиесілі көлік рөліндегі жүргізушілер қызмет барысында дабыл белгісін қосып жүріп өте алады.
Ал басқалар ше?. Басқаларға да болады, бірақ сәл-сәл ғана. Жол ережесінің дәл сол 18.2-тармағында былай жазылған: «Егер 5.9 белгiсiмен белгiленген жолақ қалған жүрiс бөлiктерiнен үзiк-үзiк таңбалау сызықтарымен бөлiнген болса, онда бұрылу кезiнде көлiк құралдары соған орын ауыстыруы қажет. Сондай-ақ мұндай жерлерде бұл жолаққа егер маршруттық көлiк құралдарына кедергi тудырмайтын болса, жүрiс бөлiгiнiң оң жақ шетiнен жолға кiрер кезде және жолаушыларды отырғызу және түсiру үшiн кiруге рұқсат етiледi».
Қорыта айтсақ, автобус жолағына шығуға болады, бірақ тек бұрылар кезде және жолаушы алғанда не оны көліктен түсіргенде ғана, онда да қоғамдық көлікке кедергі келтіруге болмайды.
Комментариев: 0