Жыл басында қос елдің өкілдері арасында келіссөз жүргізілген болатын. Оның нәтижесі бойынша көлік құралдарының Армения аумағынан Қазақстан аумағына жеткізілуін реттеу, тиісті ақпаратпен бөлісу бойынша екіжақты кеңестің ортақ хаттамасына қол қойылды.
“Ішкі істер министрлігі Қазақстан азаматтарының, сонымен қатар Арменияда уақытша тұрып жатқан тұлғалардың атына тіркелген 22 441 автокөлік бойынша мәлімет алды. Қазіргі уақытта Арменияның құзыретті органдары “жеңілдікке ие” автокөліктерді тек өз елінің аумағында қолданылуын және олардың ЕЭО құрамындағы басқа елдерге өтіп кетпеуін қамтамасыз ету үшін көлік құралдарының шетел азаматтарына тіркелуін қадағалау шараларын күшейтті”, – деді ҚР премьер-министрі Асқар Мамин.
Үкімет басшысы қазіргі уақытта Қазақстан тарапынан Ресеймен шекаралас аймақтарға шетелдік нөмірдегі көліктерді қолдану бойынша түсіндіру шараларын жүргізу мақсатында 13 полиция бекеті орнатылғанын хабарлады. 1 наурыздағы жағдай бойынша 5.5 мыңға жуық ел азаматы шетелдік көліктерге қатысты кеңес алды.
А. Мамин армениялық және басқа да шетелдік көлік иелері машиналарын тіркеуге әлі дайын емес екенін айтып, себептерін атап өтті:
– бастапқы тіркеу үшін төленетін алым сомасының жоғарылығы (автокөліктің жасына байланысты, 663 теңгеден 1 325 500 теңгеге дейін);
– 2021 жылдың 1 наурызына дейін төленуі тиіс утилизациялық алым көлемінің жоғары болуы (қозғалтқыш көлеміне қарай, 397 650 теңгеден 3 048 650 теңгеге дейін);
– елге кіргізілген автокөліктерге салынатын кедендік баж салығындағы айырмашылықты төлеу қажеттігі (әр көлік үшін жеке есептеледі);
– машиналардың Кедендік одақтың Техникалық регламентіне сай болмауы (белсенділер шетелдік көліктердің 80 %-ның талапқа сай еместігін мойындаған).
Премьер-министрдің айтуынша, шетелдік автокөлік иелері елге шеттен кіргізілген көліктердің техникалық жағдайына қарамастан толықтай заңдастырылуын сұраған. Бірақ мұндай ұсыныстар тек Қазақстанның заңнамасына ғана емес, ЕЭО мүшесі болып табылатын басқа да елдердің мүддесіне әсер етеді.
“Менің жетекшілігіммен 2020 жылдың 28 ақпанында осы мәселені қолданыстағы заңнаманы, мемлекеттік бюджет пен көлік иелерінің мүдделерін ескере отырып шешу жолдарын әзірлеу бойынша жиналыс өтті”, – деген үкімет басшысы мемлекеттік органдарға бастамашыл топтармен диалог құруды жалғастыруды, сонымен қатар рұқсат етілмеген акциялар өткізуге жол берілмейтінін түсіндіре отырып, ақпарат беру жұмыстарын күшейтуді тапсырғанын айтты.
Естеріңізге сала кетейік, шетелдік нөмірдегі автокөліктерді уақытша тіркеу 1 ақпанда басталды.
27 ақпан күні ҚР президенті Қ.-Ж. Тоқаев тіркеу мәселесін қайта қарауды тапсырды.
Комментариев: 0