«Top Gear: Polar Special» шығарылымы арқылы танылған Arctic Trucks компаниясы Toyota Land Cruiser 300-дің тюнинг нұсқасын таныстырды. Жаңа модель AT35 пакеті қолданылатын көліктер тізіміне енді.
AT35 жинағына алдыңғы амортизатор мен серіппе, артқы амортизатор кронштейні, фирмалық бастырық, 17 дюймдік дөңгелек пен жолсызбен жүруге арналған 35 дюймдік шина секілді бөлшектер кіреді. Клиент бонус ретінде шығыр (лебедка) мен шноркель орнатуға тапсырыс бере алады.
Land Cruiser 300 AT35 түрленімі жалпағырақ (ені 1980 мм-ден 2140 мм-ге артқан) болады, дөңгелек аралығы (колея) 320 мм-ге артып, кіру бұрышы 37, шығу бұрышы 30 градус (стандарт көлікте бұл көрсеткіш — 32 және 24 градус) болады . Жерден биіктігі зауыттық нұсқадан 40 мм-ге өсіп, 270 мм-ге жетеді.
Arctic Trucks жинақтарды ең алдымен Таяу Шығыстағы клиенттеріне жеткізеді. Бірақ оған бренд ресми сатылатын барлық елде тапсырыс беруге мүмкіндік бар. Яғни, «үш жүздікке» арналған тюнинг жинағын Ресейден де ала аласыз.
Комментариев: 0