АҚШ-та айрықша көлік коллекциясы сатылады

1950 жылдары Германиядан АҚШ-қа қоныс аударған Руди Кляйн жаңа отанында темірді кәдеге жарату бизнесін қолға алып, кейін миллионер атанған. Бұл оған сүйікті ісіне ақша салуға мүмкіндік берді. Кляйн өмірінің соңына дейін сирек кездесетін спорттық көліктер мен ешкімде жоқ ерекше машиналардан коллекция құрады.

Ол қайтыс болған соң 2001 жылы онсыз да жабық коллекция мүлде қол жетпейтін арманға айналды. Десе де, 1939 жылғы аса сәнді Horch 855 Special Roadster родстерін алып үлгерген адам бар екен.

Лос-Анджелесте орналасқан гараж жиырма жыл бойы қараусыз қалып, күйі кеткен. Ондағы машиналарға қамқор болатын жан табылмапты. Бастапқы иесі де көзі тірісінде ешбіріне күтім жасамай, тек раритет алғанына риза болған сияқты.

1 / 7

• 
• 
• 
• 
• 
• 
• 

1 / 7

RM Sotheby’s делдалдық ететін бәссауда қазан айында өтеді. Толық тізім кейін шығады, бірақ жария болған модельдердің өзі таңғалдырады. Ол қатарда Porsche 356, 300 SL Gullwing, бірнеше Lamborghini Miura, тағы бір Horch 855 (Ева Браунға тиесілі болған-мыс), Bertone ұсынған жалғыз Iso Grifo кабриолеті бар. Автомобильдердің халі мүшкіл, сондықтан коллекция жинаушылар арасында «қоқыс» аталып кетті.

Тізімдегі ең маңызды машина — жалғыз данасы шыққан Mercedes-Benz 500K Caracciola Special Coupe.

Германия Гран-приін алты мәрте жеңіп алып, 1938 жылы W125 Rekordwagen-мен 433 км/сағ жылдамдықта жүйткіген Рудольф Караччиолла автоспорт тарихына атын алтын әріппен жазып кетті. 1935 жылы алғыс ретінде «Мерседес» шабандозға арнап аса сәнді 500K моделін құрастырды.

Темір тұлпар соғыс көріп, кейін біраз елді аралады. Кляйнның қолына 500K Caracciola Special Coupe 1978 жылы түскен. Екі жылдан соң ел алдына соңғы рет шықты. Көзден кетсе де тарихи маңызын жоғалтпаған купе жақында тағы бір коллекцияға сән беретіні анық.