Америкалықтар UAZ-сыз қалды

Bremach Inc. фирмасының ресми сайтында мынадай жазба пайда болды: «Белгілі жағдайға байланысты барлық операция тоқтатылды, автомобиль үшін төленген депозит клиенттерге қайтарылады». Жол талғамайтын көліктен бас тартуға АҚШ-тың Ресейден келетін тауарларға шектеу қоюы себеп болып отыр.

Компания UAZ Patriot пен Pickup-ты АҚШ нарығына шығаруға бірнеше жыл дайындалғанын айта кеткен жөн. Былтыр Лос-Анджелесте стандарт көлік пен оның кез келген жолды еркін еңсеретін түрленген нұсқасын көрсетті.

Техникалық жағынан олар ресейлік машинамен бірдей. Яғни, 149 ат күшіне ие ZMZ Pro моторымен және 6 сатылы Punch Powerglide 6L50 автоматымен жабдықталады. Бағасы 26 мың доллардан басталады.

Жоспар бойынша клиенттер темір тұлпарын 2022 жылы алуы керек болатын. Компания алдын ала тапсырыс қабылдап, 2021 жылдың аяғына қарай машина алуға 130 адам өтініш бергенін мәлімдеген. Енді оларға ақшасы қайтарылады.