Алматыдан Қаскелеңге дейінгі жолды кеңейту жұмысы 20 шілдеде басталады

Былтыр қаңтарда Ташкент тас жолының (А2 трассасы) Алматыдан Қаскелеңге дейінгі бөлігін сегіз жолаққа кеңейту жоспары белгілі болған. Жобаны сол кездегі Көлік министрі Марат Қарабаев таныстырған, бірақ шенділер оның нақты қашан жүзеге асатынын айтқан жоқ.

Құрылыс кешеуілдеп, Алматы мен оған іргелес елді мекен тұрғындарының шағымы президент Қасым-Жомарт Тоқаевқа дейін жетті. 15 шілдеде өткен президент тапсырмаларын жүзеге асыру жөніндегі отырыста премьер-министр Олжас Бектенов құрылыс жұмысын дереу бастауды тапсырды. Оның айтуынша, осы аптаның аяғына дейін мердігер компания құрылыс техникасы мен жұмыс күшін жұмылдырып, 20 шілдеде жолды кеңейту жұмысын бастауға тиіс.

Қазіргі Көлік министрі Нұрлан Сауранбаев жоба қандай болатынын таныстырды. Оның айтуынша, жолдың 8 шақырымы сегіз жолақты болады, екі жолайрық пен тоғыз жерүсті жаяу жүргіншілер өткелі салынады. Нәтижесінде бұл жол бөлігінің өткізу қабілеті екі есе артады. Жоспар бойынша, 2027 жылы желтоқсанда құрылысты аяқтап, жолды пайдалануға беру қажет.