Алматыдағы үлкен айналма жол ақылы болды

16 маусымда үлкен айналма жол ресми ашылған еді. Алматының оңтүстік бөлігін бойлап жатқан трасса 66 шақырымға созылды. Бұл жерде 120 км/сағ жылдамдықпен жүруге рұқсат. Бұрын жүргізушілер жолды пайдаланғаны үшін ақы төлемеген, бірақ 21 шілдеден бастап жағдай өзгереді.

Жол ақысы қанша

21 шілдеден жолмен қанша шақырым жүргеніне қарамастан жол ақысы төмендегідей есептеледі:

• жеңіл көлік — 241.5 теңге (0.07 АЕК);
• орын саны 16-ға дейінгі автобус және 2.5 тоннаға дейін жүк көтеретін көлік — 276 теңге (0.08 АЕК);
• орын саны 32-ге дейінгі автобус және 5.5 тоннаға дейін жүк көтеретін көлік — 483 теңге (0.14 АЕК);
• орын саны 32-ден асатын автобус және 10 тоннаға дейін жүк көтеретін көлік — 552 теңге (0.16 АЕК);
• 10-15 тоннаға дейін жүк көтеретін көлік — 690 теңге (0.2 АЕК);
• тіркемесі бар жүк көліктері мен ершікті тартқыштарды қоса алғанда, 15 тоннадан ауыр жүк көтеретін автомобильдер — 759 теңге (0.22 АЕК ).

Жолды тұрақты пайдаланатын жүргізушілер

Үлкен айналма жолмен іргелес Алматы облысы аудандарында тұратындарға бір айға және бір жылға абонемент сатып алу мүмкіндігі қарастырылған:

• жеңіл көлік: бір айға —1725 теңге (0.5 АЕК), бір жылға — 17 250 теңге 5 (АЕК);
• орын саны 16-ға дейінгі автобус және 2.5 тоннаға дейін жүк көтеретін көлік: бір айға — 2070 теңге (0.6 АЕК), бір жылға — 20 700 теңге (6 АЕК);
• орын саны 32-ге дейінгі автобус және 5.5 тоннаға дейін жүк көтеретін көлік: бір айға — 3450 теңге (1 АЕК), бір жылға —34 500 теңге (10 АЕК);
• орын саны 32-ден асатын автобус және 10 тоннаға дейін жүк көтеретін көлік: бір айға — 5175 теңге (1.5 АЕК), бір жылға — 51 750 теңге 15 (АЕК);
• 10-15 тоннаға дейін жүк көтеретін көлік: бір айға — 6900 теңге (2 АЕК), бір жылға — 69 000 теңге 20 (АЕК);
• тіркемесі бар жүк көліктері мен ершікті тартқыштарды қоса алғанда, 15 тоннадан ауыр жүк көтеретін автомобильдер: бір айға — 8625 теңге (2.5 АЕК), бір жылға — 86 250 теңге (25 АЕК).

Қайда және қалай төлейді

Жол ақысын үлкен айналма жолдың barr.kz сайты немесе банк қосымшасы арқылы төлеуге болады. Жеті күн ішінде төлем жасауға да болады. Жеті күннен соң заң бұзғандар туралы ақпарат Индустрия және инфрақұрылымдық даму министрлігіне жолданады. Ведомство борышкермен байланысып, мерзімі өткен қарыз туралы ескертеді, ал төлеуден бас тартса, жетпейтін соманы мәжбүрлі өндіруге дейін барады. Бұдан бөлек борышкер Әкімшілік кодекстің 628-бабына сәйкес айыппұл төлейді: жеке тұлға болса — 5 АЕК, заңды тұлға болса — 10 АЕК.