Алматыдағы құтқарушылар Tesla Cybertruck-ты қаншаға алды

2025 жылы желтоқсанда Алматыда ТЖД түсіне боялған Tesla Cybertruck көзге түсті. Кейін Төтенше жағдайлар департаменті бұл көлікті шынымен өздері сатып алғанын, осылайша, құтқару техникасының заманауи үлгілерін сынап көріп жатқанын растады.

Мемлекеттік сатып алу порталындағы ТЖД мен Zharyq ЖШС арасындағы келісімшарттан Илон Масктың компаниясы өндірген батареялы пикапқа бюджеттен қанша қаражат жұмсалғанын көруге болады. Келісімшарт сомасы — 127.5 млн теңге.

Бұған мекеме арнайы ливреямен қапталып, радиостанциямен жабдықталған Cybertruck-ты ғана емес, DJI Matrice 4T квадрокоптерін, Starlink интернет терминалын, қорғалған Durabook ноутбугын, 5 киловаттық бензинді генератор, сондай-ақ сүйреу тросы, құрал-саймандар, қысқы шина және т.б. алған.

Құжатта Cybertruck төтенше жағдай болған жерге лауазымды тұлғалар мен жедел қызметтерді тез жеткізуге, бастапқы барлау жүргізуге, күштік құрылымдар мен құралдардың іс-қимылын үйлестіруге, оқиға орнында жедел әрекет етуге арналғаны жазылған.

Бірақ электрлі «кибертрактың» мұндай жағдайларда тиімді қызмет ете алатынына күмән көп. Өйткені ол тым үлкен әрі жүріс қоры салыстырмалы түрде аз. Мекеме бензинді генераторды машинаның жүріс қорын арттыру үшін алған сияқты.

Cybertruck — ТЖД 2025 жылы Zharyq фирмасынан сатып алған жалғыз ерекше автомобиль емес. Реестрде 5.3 литрлік V8 моторымен жүретін Chevrolet Silverado пикабына негізделген эвакуатор жөнінде келісімшарт бар, ол үшін департамент 108.9 млн теңге төлеген. Тағы 416.83 млн теңгеге GMC Sierra 3500 базасындағы екі реанимобиль алыпты.