Алматыдағы паркоматтар жаз аяғына дейін алынады

«Алматы паркинг» мемлекеттік кәсіпорны құрылды, бұған дейін автотұрақтарға жауапты болған A-Parking компаниясы қызметін сол мекемеге өткізіп береді деп хабарлады қалалық мобильділік басқармасы. Қазірше A-Parking барлық заңды міндетін атқарып, төлем қабылдап жатыр.

Компания келешекте коммуналдық мекеменің ақпарат таблосын орнату үшін ақпараттық тақта мен паркоматтарды бөлшектеуге кірісіп кетті. Бұл схема іске қосылған соң тұраққа QR-код, SMS жіберу немесе төлем терминалы арқылы төлем жасауға болады. Қолма-қол төлем дегенді ұмытамыз.

Паркоматтарды Медеу ауданында алып жатыр, Алмалы ауданы мен Бостандық ауданы өз кезегін күтуде. Қалалық мобильділік басқармасы Kolesa.kz редакциясына жаңарған тақтайшалар бар жерде ғана жаңа схема бойынша төлем жасау керектігін хабарлады. Ал паркоматтар тұрған жерде тиынмен, карточка және қосымша арқылы төлей береді. Қаладағы барлық паркоматты бөлшектеп, жаңа төлем түрін жаздың аяғына дейін енгізу жоспарланған.

Қалалық мобильділік басқармасы жақында қалада «Алматы паркинг» брендімен шығатын «паркомобильдер» пайда болады деді. Бұл көлік тұрақтарын бақылап, оның ақысын төлемейтіндерді анықтайды.