Жобадан Мұқанов көшесі солтүстік бағытта 1.243 шақырым ұзарып, Гоголь көшесі мен Райымбек даңғылының арасын жалғайтынын көруге болады. Жол жөндеушілер Бөкейханов көшесінен өтетін Райымбектегі көпірді қалдырады, ал кері бұрылатын жарты шеңберді өзгертіп, оңтүстікте Райымбектен Мұқановқа, шығыста Мұқановтан Райымбекке шығатын жол салады.
Есентай өзенімен қиылыста жол бұрыннан бар автокөпір арқылы өтеді. Мақатаевтан Байзақов жаққа шығу үшін әлі де оңға қарай шұғыл бұрылу қажет. Бірақ болашақта көпірді кеңейтіп немесе қосымша көпір жалғап, Мақатаев бойымен батысқа қарай өткел салады, өйткені бұл көше Күдеринге дейін ұзарады деген жоспар бар.
Жүргізушілерге ыңғайлы ма?
Қала билігі Мұқановтың Гогольден Райымбекке дейін бөлігін кеңейтіп, әр бағытты екі жолақты етеді, сондай-ақ жаяу жүргіншілер жолы мен веложол салып, көгал төсейді. Ол үшін жақын орналасқан бірнеше көшеден 164 жер телімін сатып алады.
Ал Райымбек даңғылындағы көпірдің астында Мұқанов көшесінің әр бағытында үш жолақтан болады.
Жобада ұзарған жол бөлігінің әр бағытының ені 7.5 м екені жазылған. Демек бір жолақтың ені — 3.5 м, екіншісі 4 метр болады. Құжатта «осы көшемен жолаушы таситын машиналар жүреді, сондықтан екінші жолақтың ені 4 метр болады» делінген. Соған қарағанда Мұқановқа қоғамдық көлікке арналған жолақ сызып, оны Райымбек даңғылына салынатын BRT желісімен байланыстыруы мүмкін.
Жол салуға қанша уақыт кетеді?
Әкімдік жер телімдерін сатып алу жұмысын 2026 жылғы 31 желтоқсанға дейін аяқтауды жоспарлап отыр. Яғни жол құрылысы 2027 жылдан бұрын басталмайды.
Комментариев: 0