Алматыдағы арнайы ХҚКО-да тағы бір қылмыстық топ ұсталды

Алматыда ХҚКО қызметкерлері, «көмекшілер» және VIN-код өзгертетін шеберлерден құралған топ ұсталды.

ІІМ мәліметі бойынша күдіктілер көлік құралының VIN-кодын өзгертіп, жалған құжат бойынша тіркеген. Олар бір «дроппердің» атына 50-ге жуық көлік рәсімдеген.

Қазір заңсыз тіркелген 150-ден астам автомобиль анықталды. Іс бойынша 17 күдікті ұсталды, заттай дәлелдер тәркіленді. «Азаматтарға арналған үкімет» корпорациясының қауіпсіздік қызметімен бірлескен тексеру жұмыстары жалғасуда.

Мәселе көліктерді бастапқы тіркеуде болып отыр, себебі мемлекетке келтірілген шығын 320 миллион теңгеден асқан. Алаяқтық, деректер базасындағы ақпаратты заңсыз өзгерту және көлік құралдарының сәйкестендіру нөмірін қолдан жасау фактілері бойынша 17 қылмыстық іс тергелуде.