Алматыдағы Әл-Фараби даңғылы үш күнге жабылады

Бүгін 10 шілде 22:00 мен 13 шілде 6:00 аралығында Әл-Фараби даңғылын Жароковтан Үшкемпіров көшесіне дейін шығыс бағытта жабу жоспарланған. Қалалық мобильділік басқармасы «асфальтбетон құйылатын болғандықтан, жолды жабу қолайлы ауа райында іске асады» деп түсіндірді. Жүргізушілер Жароков, Тимирязев пен Сейфуллин көшелері арқылы айналып өте алады.

Бұған дейін жол жөндеушілер 11 шілде таңғы 6:00-ге дейін Абай даңғылын Назарбаевтан Наурызбай батырға дейін жапқан еді. Бұл аумақты Құрманғазы, Сәтбаев, Назарбаев және Сейфуллин даңғылы арқылы айналып өтуге болады. Абай бойымен Тілендиевтен Розыбакиевке дейінгі жөндеп жатқан жерде бүгін көлік қозғалысы қалпына келтірілді. Сондай-ақ өткен демалыста Абай даңғылы Достықтан Назарбаевқа дейін, ал Әл-Фараби даңғылы Торайғыровтан Жароковқа дейін жөндеуден өтті.

Мобильділік басқармасы биыл орталық көшелерді жөндеу кезіне полимерлі асфальт қолданғанын айтты. Жол жабынына қосқан қоспалар оның аязға төзімділігін арттырып, жарықша пайда болуына, битумның шайылып кетуіне қарсы тұрады және жолдың қолдану мерзімін ұзартады деді.

Биыл Алматыда жол жабынын ауыстыру, жылу жүйелері мен су құбырын жөндеуге байланысты 200 көше қазылады. Жөндеу жұмыстары мен олардың уақыты туралы ақпаратпен мына сілтеме арқылы таныса аласыздар.