Алматыда жүз елу «сергек» жұмыс істемей тұр

Былтырдан бері Алматыдағы «сергектер» жол ережесін бұзғандарды тіркемейтін болды деген әңгіме желдей есіп жүр. Ел арасында «сергекке» жауапты «Көркем Телеком» компаниясы бағдарламаны жаңартуға ақша төлемегені үшін камералар істен шығыпты деген сөз тарады. Такси жүргізушілері қай жерде кешен жұмыс істемей тұрғанын бір-біріне айтып, сол көшелерде ережені елемей жүрген көрінеді.

Бірақ «Көркем телеком» Алматыдағы «сергектер» дұрыс жұмыс істеп тұрғанын айтады. Компанияның бизнесті дамыту жөніндегі директоры Арман Әлмерековтің айтуынша қалада 150 жаңа камера орнатылды, олар әлі жүйеге қосылған жоқ. Жүргізушілер дәл сол камералардың ереже бұзғандарды тіркемейтінін байқаған болу керек. Кейде бірер камераны техникалық себеппен өшіруге тура келеді, бірақ мамандар ақауды дереу жөндеп, қайта іске қосады.

Алматыда жалпы 766 «Сергек» кешені (383-і жол бойында, тағы 383-і көше қиылыстарында) жұмыс істеп тұр, онда 5 мың камера бар. Кешендер 2022 жылғы 12 айда 1 136 670 жол ережесін бұзу әрекетін тіркеді (шамамен күніне 3 000), жалпы айыппұл сомасы 8.332 млрд теңге болды. Былтырғы желтоқсанның өзінде 85 442 ереже бұзу сәтін анықтап, 997.2 млн теңге айыппұл жазды.

А.Әлмереков 2023 жылдың бірінші тоқсанында Алматыда тағы 575 «Сергек» кешені (493-і жол бойында, 82-сі қиылыстарда) қойылатынын айтты. Қазір жүз елуін орнатқан, олар әлі жүйеге қосылған жоқ.

«Көркем телеком» өкілдері «сергектің» арқасында 2019 жылмен салыстырғанда Алматыда жол-көлік оқиғасы 28 %, жол апатынан жараланғандар 30 %, қайтыс болғандар 40 % азайғанын хабарлады. Бұл мәлімет ҚР Бас прокуратурасы құқықтық статистика комитетінің есебімен сәйкес келеді.