Алматыда жол жөндеу жұмыстары басталды

Аудан әкімдіктері қаңтардан бастап фотоқұжат арқылы қала жолдарында пайда болған шұңқырлардың тізімін жасады. Қала тұрғындары да шенділерге фотосурет жолдаған. Мамандар барлық өтініш пен мониторинг жұмыстары негізінде жөндеуді қажет ететін аумақтардың тізімін жасады.

Жөндеу жұмыстарын жедел бастау үшін мегаполисте асфальт-бетон зауыты мерзімінен бұрын іске қосылды, биыл мына жолдардағы шұңқырлар жөнделеді:

• Алмалы ауданында — 39.8 мың шаршы метр жол. Кей жол бөлігінде жұмыс басталып кетті. Атап айтқанда, Назарбаев даңғылы Абайдан Райымбекке дейін, Төле би көшесі Назарбаевтан Байтұрсыновқа дейін, Абылай хан даңғылы Төле биден Райымбекке дейін және т.б. көшелер.
• Медеу ауданында — 50 мың шаршы метр жол. Жұмыс 2024 жылдың екінші тоқсанында басталады. Жөндеу жұмыстары Гоголь, Мақатаев, Қайырбеков, Қонаев, Қалдаяқов, Луганский және Мәметова, Назарбаев және Достық даңғылы аумағын қамтиды.
• Бостандық ауданында — 30 мың шаршы метр жол және тротуар. Биыл сәуір мен мамырда Қ. Салықов, Арайлы, Ж. Үшкемпіров, Жандосов, Талды, Центральная көшесі, Бұқар жырау бульвары және т.б аумақта жөндеу жұмысы басталады. Аудан бойынша жалпы 100-ге жуық көше жөндеуден өтеді.
• Түрксіб ауданында — 30 мың шаршы метр жол. Жұмыс басталып кетті. Лавренев көшесі мен қала шекарасынан ВАЗ-ға дейін аралықта шұңқырлар жамалып жатыр. Даналық көшесі Шемякиннен Волочаевскаяға дейін; Щелково көшесі Сүйінбайдан Гетеге дейін, Бекмаханов көшесі Сүйінбайдан Бартольдқа дейін, Шемякин көшесі Хмельницкийден Рысқұловқа дейін және Сүйінбай даңғылы Бекмахановтан жаңа көпірге дейін жөнделеді.
• Жетісу ауданында — 35 мың шаршы метр жол. Жұмыс наурызда басталып, қарашаға дейін жалғасады. Жөндеу жұмысы Күдерин көшесінің Райымбектен Рысқұловқа дейінгі; Жансүгіров Бурундайскаядан Жұмабаевқа дейінгі және Жангелдиннің Рысқұловтан Райымбекке дейінгі бөлігін қамтиды. Мамандар Құлагер, Айнабұлақ, Кемел, Рабочий поселок шағынаудандарындағы жолдарды да абаттандырып, Райымбек пен Сүйінбай даңғылының қиылысындағы жолайрықты жөндейді.
• Әуезов ауданында — 50 мың шаршы метр жол. Жөндеу жұмысы С. Шаймерденов — Жандосов, Алтынсарин — Қабдолов көшелерінің қиылысындағы бөлікті; Қабдолов көшесіндегі № 2 үй аумағы; Өтеген батыр — Алтынсарин қиылысын; Абай даңғылының Момышұлы көшесінен шығысқа қарай бөлігін; Сүлейменов және Жандосов көшесінің батыс жағын; Алтынсарин — Жұбанов қиылысын қамтиды, сонымен қатар «Таугүл-1» шағынауданы және т.б аумақтағы жолдар жөнделеді (Әкімдік жұмыс қашан басталатынын айтқан жоқ. — Kolesa.kz ред. ескерт.).
• Алатау ауданында — 30 мың шаршы метр жол. Жұмыс сәуірде басталады. Жанқожа батыр, Әубәкіров, Тәкежанов, Жалайыр, Шоған Абыз, Тілендиев көшесі, ҮАК, Рысқұлов, Райымбек даңғылы және т.б жолдағы шұңқырлар жамалады.
• Наурызбай ауданында — 45 мың шаршы метр жол. Жөндеу жұмысы Қ. Надыров көшесі Шолпаннан Тәжиевке дейін; Тәжиев көшесі Надыровтың аяғына дейін; Жандосов пен Қонаевтың кей бөлігі және т.б жолдарды қамтиды.

Әкімдік биыл ұзындығы 250 шақырым болатын 274 көше орташа жөндеуден өтетінін хабарлады. Көшелердің толық тізімі мен орташа жол жөндеу жұмыстарының жоспары техникалық құжаттың сараптамалық қорытындысын алған соң сәуірде жарияланады.

Жол жөндеушілер жол төсемін жаңартып, тегістейді, сондай-ақ су жүйесі мен басқа жол құрылыстарын жөндейді. Жолдарды кеңейтіп, автотұрақ, тротуар және велосипед жолын салады.

2023 жылы Алматыда ұзындығы 200 шақырым болатын 175 көшенің жол төсемі жаңарды. Ал биыл қалада бұдан да жол жөндеуден өтеді.

Қазір қаладағы жолдардың жалпы ұзындығы — 3097 км.