Өткен демалыс күндері қала басшысы қалада іске қосылатын көлік реформасы жайлы сөз қозғады. Шендінің айтуынша, Канада мен Еуропадан келген халықаралық кеңесшілермен бірге қаланың даму серпінін бағалау мақсатында зерттеу жүргізілген. Болжамға сай, 2035 жылға қарай Алматы тұрғындарының саны үш миллионды құрайды екен.
Әкімнің сөзіне сенсек, мұндай жағдайда жайлы өмір деңгейін сақтау үшін қаладағы қоғамдық көліктің санын анағұрлым, яғни 1.5 мыңнан 6 мыңға дейін арттыру қажет, сонымен қатар, 2035 жылға дейін жеке автокөліктер санын бұрынғы қалпында сақтау керек көрінеді.
Қазіргі таңда Алматыда 472 мыңға жуық автокөлік, басқаша айтқанда, 1000 адамға 258 көлік тіркелген. Тағы 250 автокөлік қалаға күнделікті енеді. Аталған сандарды 17 жыл бойы қалай тұрақты түрде ұстап тұратыны әзірге сұрақ күйінде қалып отыр. Әлемдік тәжірибеде автопарк өсімін шектеудің тіркеуге қою бағасын арттырудан бастап, жаңа мемлекеттік нөмірлерді беруге тыйым салуға дейінгі алуан түрлі әдістері бар. Ескере кететін жәйт, егер қала басшысының ойы іске асатын болса, онда 2035 жылға қарай 1000 адамға шаққандағы автокөлік саны 155 данаға дейін қысқарады.
Егер біз аталмыш көрсеткіштерге қол жеткізбесек, онда экология мен өмір сүру сапасы әлдеқайда нашарлайды, біз бұған жол бермеуге тиіспіз. Біз қазір жасап жатқан қоғамдық көліктің сапасын арттыру, трафикті қайта бөлу сынды әрекеттердің барлығы қаланың әрі қарай тұрақты дамуы үшін жасалуда. Бұл жүйелі тәсілді, үлкен күш пен алматылықтардың қолдауын қажет ететін күрделі міндет, — деп мәлімдеді Алматы қаласының әкімі Бауыржан Байбек.
Комментариев: 2