Қалада Toyota Camry ұрлығының тым жиілеп кеткені туралы көлік иелері әлеуметтік желіде хабарлады.
Ер адамдар өзге Camry иелеріне сақтық танытып, GPS функциясына ие сапалы дабыл белгісін орнатуға кеңес берді. Тәртіп сақшыларының айтуынша, қолды болған 17 Camry-дің табылған 11-і трекермен жабдықталыпты.
Департамент мамандары бұрын Алматыда көбіне «мазда» 626 не ВАЗ секілді ескі көліктердің ұрланатынын айтады, оларды қаскөйлер тек діттеген жеріне жетіп, ішіндегі ең құнды заттарды алу үшін пайдаланады екен. Бірақ қалада көрші елдерге өткізіп жіберу мақсатында TLC 200 және Lexus LX 570 сияқты жол талғамайтын көліктердің де ұрланғаны туралы дерек тіркелді. Соңғы кездері олардың қатарына салыстырмалы түрде жаңа Camry де қосылды.
Жалпы оңтүстік астана көлік ұрлығы бойынша көш бастап тұр. Өткен жылы 255 автокөлікті қылмыскерлер айдап кеткен. Сөз реті келгенде айта кетсек, Ресейде 2018 жылы Toyota Camry қаскөйлер жиі көз тігетін шетелдік көліктердің алғашқы үштігіне кірді. Ел арасында танымал «жетпісінші» үлгілерді қалай ұрлайтынын «Угона.нет» арнасынан көруге болады.
Естеріңізге сала кетейік, ҚР ҚК-нің 200-бабына сәйкес, автокөлікті жымқыру мақсатынсыз заңсыз иеленіп алу 1000 АЕК сомасына дейiнгi мөлшерде айыппұл салуға не сол мөлшерде түзеу жұмыстарына не 600 сағатқа дейінгі мерзімге қоғамдық жұмыстарға тартуға не екі жылға дейiнгi мерзiмге бас бостандығын шектеуге/бас бостандығынан айыруға жазаланады.
Ал сату мақсатында иеленіп алу 5 жылдан 8 жылға дейін бас бостандығын шектеу жазасына әкеп соғады. Ал бірнеше рет, қылмыстық топ құрамында жасалған қылмыс не көлікті иесіне күш көрсету арқылы иелену әрекеттері үшін айыпты он жылға түрмеге қамалуы мүмкін.
Комментариев: 0