ҚР президентінің ресми порталы хабарлағандай, бейсенбі, 7 ақпан күні Нұрсұлтан Назарбаев «Astana Group» басшысы Нұрлан Смағұловпен кездесті. Кездесу барысында кәсіпкер Алматыда Hyundai маркалы жеңіл көліктерді өндіретін зауыт құрылысының басталғанын айтқан.
— Кәсіпорынның қуаттылығы алғашқы кезеңде 30 мың көлік шығаруға жетсе, екінші кезеңде жылына 45 000 көлікке дейін ұлғаяды. Бұл бізге қазақстандық нарықты сапалы әрі баға жағынан қолжетімді Hyundai маркалы жөңіл көліктермен толықтырып, оларды ТМД елдеріне экспорттауға да мүмкіндік береді. Жобаға құйылған инвестицияның жалпы көлемі 25 миллиард теңге. Өз қаражатымыздан бөлек коммерциялық шарттарға негізделген қарыз ақша да тартылады. Зауыттың ашылуы 700 жаңа жұмыс орнын құруға мүмкіндік береді, — деп мәлімдеді Смағұлов.
Қазіргі таңда Қазақстанда Hyundai маркасына тиесілі Tucson, Santa Fe және Elantra сынды кейбір үлгілердің ірі торапты әдіспен құрастырылып жатқанын айта кеткен жөн. Оларды Қостанайдағы «СарыарқаАвтоПром» зауыты өндіруде. 2018 жылы конвейерден 9 мыңға жуық көлік шыққан.
Комментариев: 0