Алматыда полицейлер 1700 мопедті айыптұраққа қойды

Бүгін брифингте Алматы полиция департаментінің өкілдері мопедке қатысты жағдайды баяндады. Олардың талдауына сәйкес жағдай ушығып барады.

Қалада шамамен 50 мың скутер бар, ал биыл жыл басынан бері мегаполисте 743 жол-көлік оқиғасы тіркеліп, оның ішінде 757 адам жарақат алып, 14 адам қаза тапқан. Былтыр осы кезеңде мопедшілер 293 апатқа қатысқан. Яғни, мұндай оқиға саны 2.5 есе артқан.

Мопед тіркелмегендіктен және әр патрульге олардың артынан жүру мүмкін болмағасын, полицияның пікірінше, мопедшілер білгенін істеп жатыр. Бұл жаңалық емес, бірақ айқын факт. Полиция жолдағы тәртіпсіздікпен күресу үшін рейд ұйымдастыруда. Алматы тұрғындары осындай рейдті көрген шығар. Мұндай алдын алу шаралары нәтижесінде тәртіп сақшылары мопед жүргізушілеріне 31 мың хаттама толтырып, 1700 скутерді айып тұрағына қойған.

Департамент мәлімдегендей, мопедтер айып тұрағына көбінесе алдын алу шарасы ретінде жіберіліп жатыр. Иесі мототехника құжатын көрсеткеннен кейін ғана кері ала алады. Полицейлер конституциялық құқық бұзылмағанын айтты, ал патруль қызметкерлері осылайша 20 ұрланған мопед тапқан.

Тәртіпке назар аударғандарына рақмет! Алайда қазіргі заң бойынша мопед жүргізушілері құжат ұстап жүруге және бірнәрсені растауға міндетті емес. Елімізде кінәсіздік презумпциясы әлі жойылған жоқ. Мопед — тек зат, тіркеуді қажет етпейтін құрылғы. Дегенмен ол үлкен, дөңгелегі мен қозғалтқышы бар және жолда дұрыс пайдаланбаған жағдайда қауіпті. Скутер негізінен велосипедке ұқсас. Бірақ ешкім көшеде велосипедті тоқтатып, сатып алғанын дәлелдеуге мәжбүрлемейді. Кішігірім мототехниканы тіркеу мәселесіне кем дегенде екі жыл бұрын жеткізу қызметі қала өмірінің бір бөлігі болғанда көңіл бөлу керек еді.

Ешқандай мәміле рәсімдемей бірнеше рет иесін ауыстырып үлгерген немесе жалға алынған мопедті тізгіндеген иесінен құжат талап ету — оғаш. Техниканың бір бөлігі ломбардта қалса, микроқаржы ұйымдары да оларды тіркеусіз сатады. Бұл жағдай бізде қалай реттеледі? Мұндай «алдын алу» әдістің заңды екенін прокуратура қарастыруы керек.

Біз мопедшілердің әрекетін қорғап отырған жоқпыз. Өзіміз де қала көшелерінде жүріп, олардың жол ережесін бұзғанын жиі көреміз, газ шығару жүйесінің дыбысын естиміз және олардың қатысуымен болған апаттарға куә боламыз. Бірақ заң барлығына бірдей болуы керек.

Сіз осындай «алдын алу» шарасына қалай қарайсыз?