Қаңтардың алғашқы күндері бұзақылар 1600 бизнес нысанына залал келтірді. Көбі шағын және орта кәсіп иелері. Жалпы шығын көлемі 95 млрд теңгеден асады. Тәртіпсіздік кезінде ғимараттардан бөлек кәсіпкерлерге тиесілі талай көлік те бүлінді.
Мегаполис әкімінің орынбасары Ілияс Өсеров жеке және заңды тұлғалардың шығыны өтелетінін немесе оны қалпына келтіру үшін ақша берілетінін хабарлады. Кімнің қанша алатынын комиссия анықтайды. Қаражат бюджеттен және «Күшіміз бірлікте» қорынан алынады.
Әзірше тек кәсіпкерлерді қолдау схемасы жасалды. Олар InfoKazakhstan арқылы электронды өтінім бере алады. Ал көлікке өтемақы алу үшін полицияға арыз жазып, машинаның техникалық құжатын, заңды тұлғаға рәсімделген құжаттар мен зақымдалған жерлерін бағалау нәтижесі жазылған акт өткізу қажет. Арызға ЭЦҚ көмегімен қол қойылады, әрі қарай оны комиссия қарайды.
Ілияс Өсеровтің айтуынша, жеке тұлғалардың шығынын өтеу жобасы әзірленіп жатыр. Ұрланған көліктерге қатысты іс қылмыстық заңнамаға сай тергеледі. Ал қираған машинаның несиесі кешірілмейді, тек көлік иесіне өтемақы беріледі.
Комментариев: 0