Желіде тараған шулы видеоға түсіп қалған Алматы қалалық КПБ-ның басшысы жұмысынан айырылды. Естеріңізге сала кетейік, бейнежазба кадрларынан Cadillac Escalade, Mercedes-Maybach, G-класс сынды қымбат көліктерді тізгіндеген бір топ жігіттің оңтүстік астанадағы блокбекеттердің бірінен еш кедергісіз өткенін байқауға болады. «Шытырман оқиғалы фильм» желі қолданушыларының ашуын келтіріп, полиция оған қатысқан «әртістер» мен «режиссерді» құрықтады.
Төтенше жағдай кезінде Алматыдағы блокбекеттен заңсыз өту дерегі бойынша бес адам ұсталып, әкімшілік жазаға тартылғанын, ал олар мінген төрт автокөліктің айып тұрағына жіберілгенін жергілікті полиция департаментінің баспасөз қызметі хабарлады.
Аталған жағдайдың болуына жол берген және оның алдын алу үшін еш әрекет жасамаған полиция қызметкерлеріне тәртіптік жаза тағайындалды. Одан бөлек, той кортежіне қатысушылармен бірге көңіл көтерген Алматы қалалық криминалдық полиция басқармасының басшысы Жанболат Зиадин мен патрульдік полиция полкі командирінің орынбасары Қуанышбаев қызметінен босатылды.
Комментариев: 0