Алматы тұрғыны үш көлікті ұрлап, үш рет жол апатына түсті

Алматы полициясына алғашқы оқиға туралы кеше кешкі сағат 21:45-те қоңырау түсті. Бір жігіт Құлжа тас жолының бойында орналасқан тұрғын үй кешенінен BMW көлігін ұрлап кетіпті. Ол ауладан шыға бергенде сонда тұрған Audi-ді соғып, ізін суытқан.

Сол беті Есік қаласына жеткен жігіт қарсы жолаққа шығып «Тойотамен» соқтығысады, содан кейін машинаны тастап, жаяу қашқан. Көп өтпей ол 28 жастағы бойжеткеннің Nissan көлігін тартып алып, басы ауған жаққа кетпек болғанда машинасы аударылып қалыпты.

Куәгерлер жедел жәрдем шақырады, ал ол өзіне көмек көрсетуге келген дәрігерлердің машинасын ұрлап, қайтадан Алматыға бет алған. Қалада оны бірнеше полиция көлігі қуып, қолға түсірді.

Алматы қаласы ПД баспасөз қызметі хабарлағандай, көлік ұрлаған 28 жастағы жігіттің есірткі тұтынғаны анықталды. Күдікті ұсталып, оған қатысты үш қылмыстық іс және жол апатына байланысты бірнеше әкімшілік іс қозғалды. Ол енді бес жыл түрмеде отыруы мүмкін.