Мопед жүргізушілерін қарда да, аязда да Алматы көшелерінде көру үйреншікті болып кетті. Қала сыртындағы жолда, әсіресе боранда скутер кездестіру адам сенгісіз жағдай. Қазақстандық Евгений Безкоровайный немесе өзінің айтуынша Джон Пыль Дорог ұзақ жолға бірінші рет шығып тұрған жоқ. Ол мототехника жазға арналған көлік дегенмен келіспейді және шектеу тек адамның миында екенін дәлелдеді.
Жаңа саяхат былтыр 1 желтоқсанда басталды. Осы уақытқа дейін Шығыс Қазақстанды, Алтайды, Моңғолияның бір бөлігін және Ресейдің шығыс бөлігін, соның ішінде Владивосток пен Благовещенскіні (Ресей Федерациясы, Амур облысы) жүріп өтті. Жалпы алғанда 10 мыңнан астам шақырым басып өткен. Отандасымыз жоқ дегенде қиыр солтүстікке, дәлірек айтсақ Лаптев теңізіне дейін жетуді көздеп отыр.
Екі дөңгелекті көлікті қаланың ішінде басқару қиын, ал Евгений болса жолға жайлы мопедпен емес, біраз жақсарған қытайлық скутермен (150 текше см) шықты. Саяхатшы 400 км тоқтаусыз жүру үшін канистр алған. Скутерде рөл жылытқыш және желден қорғайтын үлкен әйнек, қосымша шам бар, дөңгелегі автомобильдің жіңішке шинасымен қапталған.
Сапар оңайға түспегенін айтып өту керек. Жаңбыр, қар, ауа температурасының 42 градусқа дейін төмендеуі, техникалық проблемалар, екі рет жөнделген мотор бірталай қиыншылық тудырды. Аптаның басында моторды жөндеуге тура келді.
Бұл Джонның бірінші сапары емес. Райдер 2015 жылдан бері мопед тізгіндейді, ал қыста жүргізуді 2018 жылы бастаған. Қазақстан тұрғыны 10-нан астам мемлекетте болып, 50 000 шақырымды артта қалдырған.
Ол ешқандай серіктессіз, көмекші көліксіз жалғыз саяхаттайды. Екі адам болып немесе топ болып жүру қиынға соғады, өйткені әркімнің өз ырғағы мен мақсаты бар және физикалық дайындығы әртүрлі болады, осының бәрі кері әсерін тигізеді деген еді.
Евгенийдің оқиғаларын Instagram парақшасынан көруге болады. Біз материалды жариялаған уақытта саяхатшы стористе Благовещенскіден Якутскіге жол тартқаны туралы жазба шыққан болатын.
Kolesa.kz редакциясы жүрек жұтқан мотосаяхатшыға ақ жол тілейді, армандары орындалып, аман-есен оралсын дейміз.
Комментариев: 0