Алматы полициясы жазғы дөңгелекпен жүргендерге айыппұл сала бастады

1 желтоқсаннан ақпанның аяғына дейін жолда жазғы шинамен жүруге тыйым салынады. Бұрын полиция бұл ережені елемейтіндерді қатты қадағаламай, түсіністікпен қарайтын. Биыл қыс басталғалы жағдай өзгерді.

Алматыда ауа райы күздегідей. Қыстың алғашқы күні қар жауды, бірақ тез еріп кетті. Informburo.kz хабарлағандай, полицейлер 1-2 желтоқсанда қалада техникалық регламент талаптарына сай келмейтін көлік құралын басқарған жүргізушілерге Әкімшілік кодекстің 590-бабы 5-бөлігі бойынша 21 хаттама толтырды.

Астанаға қыс ерте келгеніне қарамастан, полицейлер тек ескерту жасап жатыр. Бірақ жақында қатаң шараға көшетіні анық.

Әкімшілік кодекстің 590-бабы 5-бөлігіне сәйкес, қыста жазғы дөңгелекпен жүргендер 5 АЕК (2024 жылы 18 460 теңге) төлейді. Бір жылда ережені қайта бұзса, 20 АЕК айыппұл арқалайды.

Ұмытып кеткендер немесе үлгермегендер болса, дереу ауыстырыңыздар!