Оқиға бүгін таңертең сағат 4:50 шамасында Шығыс айналма жолда болды. Куәгерлер әлеуметтік желіге жүргізушінің ұсталған сәтінен видео жариялады.
Бейнежазбадан полицейлердің ақ түсті седан терезесін сындырып жатқаны байқалады. Видеоға жазылған пікірлерде полициядан қашқан Accent-тің Шығыс айналма жолдың бойымен 120–140 км/сағ жылдамдықпен жүйткіп, үш көлікке соғылғаны айтылады. Жүргізуші ұсталды. Бірақ оның жағдайы мен зардап шеккендер туралы қазірше ақпарат жоқ.
Кейін Алматы қалалық ПД баспасөз қызметі ресми мәлімдеме жасады. Hyundai Accent қала аудандарының бірінде ұрланған. Тәртіп сақшылары оны тоқтатпақ болған кезде жүргізуші бұйрықты елемей, қаша жөнеледі. Жоғары жылдамдықпен жүрген азамат жолдағы көліктерге бірнеше рет соғылған. Жол апатынан кейін ол есінен танып, аяғы газ педалінде қалады. Полицейлер көлікті ашып, адам өмірін сақтап қалу үшін бар күшін салған. Олар әйнекті сындырып, оталып тұрған машинаны тоқтатты.
Алғашқы медициналық көмек көрсетілгеннен кейін ұсталған адам істің мән-жайын анықтау үшін Бостандық ауданындағы полиция бөліміне жеткізілді. Қылмыстық кодекстің 200-бабы 1-бөлігі (Автомобильдi немесе өзге де көлiк құралын жымқыру мақсатынсыз заңсыз иеленіп алу) бойынша сотқа дейінгі тергеу басталды. Бұл бапқа сай айыпталушы ірі көлемде айыппұл төлейді немесе түзеу жұмыстарына тартылады, не 2 жылға дейін бас бостандығынан айырылады.
Комментариев: 0