Алматы облысында полиция тәртіпті дронмен қадағалай бастады

Облыстағы рейдтер 10 мамырда басталып, 30-ына дейін жалғасады. Үш күнде патрульдік полиция 1800-ден астам әкімшілік хаттама толтырып, 53 көлікті айыптұраққа қойды, 25 адамды медициналық айықтыру орталығына жеткізді. Талғар тас жолында тәртіп бұзғандар дрон көмегімен анықталып, бүтін сызықты кесіп өткен үш жүргізушіге айыппұл салынды.

«Талдау көрсеткендей, жол апатының негізгі себептері — жылдамдықты шектен асыру, қарсы бағытқа шығу, сондай-ақ жол белгілері мен таңба талаптарын сақтамау. Осыған орай, жол-көлік оқиғасы жиі болатын аймақтарда жазатайым жағдайлардың алдын алу және тәртіп бұзушыларды анықтау үшін арнайы дрон-квадрокоптер қолданылды. Оның көмегімен жолда тәртіп орнатып, ереже бұзатындарды барынша азайтуды көздеп отырмыз», — деді Алматы облысы жол полициясы департаментінің басшысы Бауыржан Әленов.

Kolesa.kz редакциясы жол ережесін бұзатындарды ешбір жағдайда ақтамайды, бірақ полицияның заң шеңберінде әрекет етуін жақтайды. Дронға қатысты заң патрульдік полиция мен олардың әуе операциялары жағында емес екені анық.

Әкімшілік кодекстің 802-бабында «сертификатталған арнайы техникалық бақылау-өлшеу құралдары мен бақылау аспаптарының көрсеткiштерi, оның ішінде автоматты режимде жұмыс iстейтiн және жолдағы жағдайды фото-, бейнетүсiрiлiм арқылы, көлiк құралының жүру жылдамдығы мен бағытын, басқа да жол жүрiсiне қатысушылардың iс-қимылын айқындау арқылы автомобиль көлiгi және жол жүрiсi қауiпсiздiгi саласында әкiмшiлiк құқық бұзушылық жасалуын тiркейтiн бақылау аспаптарының көрсеткiштерi» әкімшілік құқық бұзушылық туралы істі қозғауға негіз бола алады деп көрсетілген.

Мұндағы негізгі сөз — «сертификатталған», ал квадрокоптердегі камера ереже бұзғандарды тіркеуді бастамас бұрын метрологиялық салыстырып тексеруден өтуі керек (Әкімшілік кодекстің 31-бабы). Бірақ «Метрологиялық аттестаттаудан өткен өлшем құралдары» реестрінде дрон жоқ. Облыстық полицейлердің өзі электроника дүкенінен сатып алуға болатын қарапайым квадрокоптер пайдаланатынын мойындап отыр.

Осылайша, әуеден бақылаушыларға сүйене отырып, жол ережесін бұзғаны үшін әкімшілік іс қозғау мүмкін емес. Бұл жағдайда жүргізушінің кінәсін растайтын дәлелдер Әкімшілік кодекстің талаптарын бұза отырып алынған және нақты деректердің дұрыстығына кепілдік бермейді (Әкімшілік кодекстің 765-бабы, 3-тармағы. Дрон сертификат алмаған).

Істі қараған кезде квадрокоптер түсірген видеоны есепке алу немесе алмауды сот шешеді. Куәлігінен айырылу алдында тұрған жүргізушілер кәсіби заңгердің көмегімен осы сәйкессіздікті пайдаланып, өз құқығын қорғай алады.